21-тӥ тулыспал – Анай кыллэн калыккуспо нуналэз. Солы луыса, Калыкъёслэн Эшъяськон юртазы пӧртэм ужрадъёс ортчозы. 16-тӥ тулыспалысен 8-тӥ южтолэзёзь «Родной язык, тебя я берегу» (12+) нимо адӟытон ужа, отын возьматэмын пӧртэм калыкъёслэн литературазы, алфавитсы, кыллюкамъёссы, азбукаоссы, газетъёссы но нылпи книгаоссы. Суредаськись Ирина Золотарева татчы этно шӧмъем натюрмортъёссэ интыяз.
«Билингва» Удмурт центр»(0+) ӵектос улсын пиналъёслы но егитъёслы занятиос ортчозы. Солэн валтӥсь ужпумез – элькунысь кун но мукет кылъёсты утён но азинтон.
19-тӥ тулыспалэ этнокультурной школаослы сӥзем фестиваль усточиосты ас котыраз люкалоз. Дышетскисьёс анай кылзы сярысь мадёзы, кырӟанъёс кырӟалозы, пӧртэм калыкъёслэсь сиён-юонъёссэс тодылозы но соосты веръялозы.
Удмурт Элькунысь Кун йӧскалык театрын 25-тӥ ползэ ни ортчозы «Кузебай Герд: рождённый на рубеже веков» (12+) нимо Герд лыдӟиськонъёс, кудӥз сӥземын удмурт кылбурчилэн вордскем дырысеныз 125 ар тырмонлы. Конференциын докладъёсынызы тодматозы доцентъёс, тодослыко ужасьёс но дышетӥсьёс. Ужрадэз шулдыртозы Кузебай Герд нимо гимназиысь дышетскисьёс, фольклоръя но крезен шудӥсь ансамбльёс. Со сяна, пӧртэм удысъёсысь ӧнерчиосты, кудъёсызлэн ужзы быдэсак удмурт йӧскалыкез утёнлы но азинтонлы сӥземын, Кузебай Герд нимо премиен данъеталозы. Ужрад йылпумъяськоз «Трокай» нимо спектаклен.
– Туэ анай кыллэн нуналэзлы сӥзьыса тужгес но бадӟым ужрадъёс XXV Герд лыдӟиськонъёс дыръя ортчозы, отчы Удмурт шаерысь, Башкортостанысь, Татарстанысь, Марий-Эл Элькунысь но Пермь улосвылысь ог 500 адями пыриськоз. Бадӟым саклык висъямын нылпиос но егитъёс понна дасям ужрадъёслы, малы ке шуоно 2022-тӥ ар ӵапак соослы сӥзьыса ялэмын, – пусйиз Эдуард Петров, УЭ-ысь йӧскалык политикая министр.
Тодэ вайытоно, бигер нылпи кылбурчиен но драматурген Рафаис Курбановен пумиськон ортчиз ни шуыса (6+). Ужрадэ пыриськизы школаын дышетскисьёс, «Чулпан» нылпи театрысь ёзчиос, Удмуртиысь йӧскалык-лулчеберетъя огазеяськонъёсысь кивалтӥсьёс но усточиос. Озьы ик радъяськиз «Вечер культур» (18+), кытын кунгож сьӧрысь студентъёс асьсэлэн шаерзы, кылзы, сиён-юонзы сярысь мадизы. Таяз аре пумиськон Алжирен герӟаськемын.
Вань ужрадъёс дышетӥсьлы но визьнодасьлы сӥзем Арлэн куронэзлы тупало. Соос юртто пӧртэм кылын вераськись дышетӥсьёслы, дышетскисьёслы, студентъёслы ог-огзылэн культураенызы мургес тодматскыны, анай кылзэс юнгес дышетыны.