16-тӥ гудырикошконэ Лудорвайын IX Улосвылкуспо «ГуртFEST» но Финн-угор лулчеберетъя «Артана» фестивальёс ортчизы.

Ужрадэ 2,5 сюрлэсь уно куноос люкаськизы, вуылӥзы Удмуртиысь, Башкортостанысь, Татарстанысь, Ханты-Мансийскысь, Карелиысь, Сыктывкарысь но Москваысь.

Улосвылкуспо «ГуртFEST» гурт лулчеберетъя фестиваль Удмуртиын 2015-тӥ арысен ортче. Ужрад этника удысын лулчеберет дунлыкъёсты но сям-йылолъёсты утёнлы но азинтонлы сӥземын. Фестивале трос пӧртэм калыкъёс люкаськизы.

«Асьме фестиваль марафонмы бадӟым луонлык сётэ финн-угор лулчеберетэн но адямиосын матэгес тодматскыны. Ми возьматыны тыршиськомы, лулчеберет – со вашкала сям-йылолъёсты утён гинэ ӧвӧл, со азинтӥськись, вылезлы усьтӥськись арбери но», – вераз «Лудорвай» музей-заповедниклэн кивалтӥсез Татьяна Шкляева.

Ужрадын пӧртэм дэменлыкъёс концерт радъязы, соос пӧлын удмуртъёс, бесерманъёс, бигеръёс, поръёс, камсьӧр удмуртъёс, ӟучъёс. Со сяна фестивальын паймытӥз  Ханты-Мансийскысь фольклор ансамбль «Нярихумит нэг» — «НарЫкарские женщины».

Котькудӥз усадьба «улӟиз» та нуналэ. Фольклор дэменлыкъёс куноосты пумитазы но йӧскалык дӥсь но ӧнеръёс сярысь мадизы.

Озьы ик куноос етӥнэз утялтон сярысь тодӥзы – мерттэмысеныз басма кылдытозь. Ӧнерчиос пӧртэм техникаос возьматӥзы но етӥнлэсь пайдаез сярысь веразы.

Со сяна дасямын чечы вузан но аспӧртэмлыко «Чечым чечы» веръян.

«Удмурт дунне» газет «Гурт адями» премия сётӥзы.

Вожвылъяськон мыло-кыдо тыршись гуртоосты данъянлы сӥземын.

Финн-угор лулчеберетъя «Артана» улоскуспо фестивальын дасямын вал пӧраськонъя мастер-классъёс, стендап-шоу, этномода адӟытон.  Озьы ик егит удмурт суредасьлэн Леонид Бусыгинлэн суредъёсыныз тодматскизы.

Та выллем ужрадъёс этнической туризмез вӧлмыто но тросгес куноосты шаерамы кыско.

Туспуктэмъёс: Кирилл Маловлэн но Марина Шуравиналэн.