Та юанлэн валэктонэз – бесерманъёс. Бесерманъёс – Удмуртилэн уйшор палаз улӥсь калык. Солэн 96%-эз элькунамы улэ. Та калык пумысен тодосчиос туннэ нуналэ но споръясько: кинъёс со – бигермем удмуртъёс яке удмуртомем бигеръёс?

Бигер асэстэмъёсын удмурт кылзы, чуваш калыклы матын луись калык дӥсьсы, аспӧртэмлыко осконзы – тӥни ма нош но нош малпаськытэ но тунсыкъяськытэ асьмемыз. Соин но, дыр,та калыклэн кылдэмез сярысь пӧртэм валэктонъёс кылдылӥзы. Кин ке но соосты Александр Макендонскийлэн йыромем ортядэз шуыса но вералляз.

Нош Яр ёросысь Вортча гуртын 6-тӥ инвожое (кутсконэз 11.00 часэ) бесерманъёслэн Кöрбан йӧскалык шулдыръяськонзы ортчоз. Элькунысьтымы бесерманъёс сяна татчы Киров улосысь, Москваысь куноос люкаськозы. Котьку сямен татын «Кöрбан» вӧсяськон ортчоз, кылыны луоз бесерман крезьёсты, пыриськыны луоз визь сынан вожвылъяськонъёсы.

Удмурт Элькунысь йӧскалык политикая министрлэн нырысетӥ воштӥсезлэн, П.А. Орловлэн, верамезъя, туэ та шулдыръяськонын валтӥсь инты басьтоз «Визьбугор». Визьбугор – со егитъёсты сям-йылолъёслы дышетон, пиналъёсты но мӧйыосты герӟан, ӵыжы-выжыослы таукарон.

Шулдыръяськонэз радъяло: Удмурт Элькунысь йӧскалык политикая министерство, «Яр ёрос» муниципал кылдытэт Администраци, Калыкъёслэн Эшъяськон юртсы, «Ворцинское» муниципал кылдытэт, Удмурт Элькунысь бесерманъёслэн огазеяськонзы.

Ватсаса ивортодэт басьтыны луэ таӵе телефонъёсъя: (3412) 63-10-00 – Федорова Татьяна Петровна, Калыкъёслэн Эшъяськон юртсылэн кивалтӥсезлэн воштӥсез; (3412) 63-10-22 – Корепанов Дмитрий Валериевич, Калыкъёслэн Эшъяськон юртсылэн режисёрез; (3412) 63-10-81 – Келарева Елена Александровна, Калыкъёслэн Эшъяськон юртысьтызы методист; (3412) 63-10-44 – Прокопьев Андрей Николаевич, Калыкъёслэн Эшъяськон юртысьтызы Калыккуспо но финн-угор кусыпъёсъя езэтлэн кивалтӥсез.

ПРОГРАММА:

10.00 – 11.00 – куно пумитан

10.00 – 15.00 – киужъёсын адӟытон но вузкарон, кафеослэн ужан дырзы

11.00 – 11.45 – шулдыръяськонэз усьтон

11.45 – 12.00 – «Кӧрбан» вӧсь, ӝукез вӧсян

12.00 – 13.00 – «Возьвыл жӧк» вӧсям ӝукез сиён

12.00 – 14.00 – нылпиослы шудон сэрег

12.00 – 15.00 – «Кӧрбан шудонъёс» пиналъёслы но егитъёслы шудонъёс но ӵошатсконъёс

12.30 – 15.00 «Бесерман гуръёс» – ёросъёсысь коллективъёслэн кырӟан-эктонъёссы