18-тӥ южтолэзе Калыкъёслэн Эшъяськон юртазы ортчиз Мадьяр лулчеберетлы сӥзем нуналъёсты усьтон.

Эшъяськон юртын ужасьёс куноосты пуминатыз пор, удмурт, бигер, еврей кырӟанъёсын. Калыкъёслэн эшъяськон юртсылэн кузёез А.В. Шукликн кунсьӧрысь куноослы возьматӥз юртсэ, вераз ужъёссы но планъёссы сярысь.

Тодматскон орчем бере куноос пуксизы котырес ӝӧк сьӧры. Пумиськонэз усьтӥз Удмурт Элькунысь йӧскалык политикая министрлэсь ужзэ быдэсъясь Лариса Николаевна Буранова. Финн-угор дунне, йӧскалык кусыпъёсты юнматон, азинтон но паськытатон сярысь вераськизы В.Е. Владыкин, А.Н. Прокопьев, О.А. Тронина, В.В. Папаева но мукетъёс. «Удмурт Кенеш» огазеяськонлэн кивалтӥсез И.Н. Семенов Венгриысь посолы удмурт кылын Библиез кузьмаз. Пумиськон туж шуныт но пайдалыко ортчиз.

Мадьяр лулчеберетлы сӥзем нуналъёсты усьтыны ӧтемын вал элькун кивалтэтысь адямиос. Куноосты ӟечкылаз Удмурт Элькун Кивалтэтлэн Тӧроезлэн воштӥсез Людмила Чунаева, Венгрилэн Россия Федерациысь посолэз Иштван Ийдярто, Удмурт Элькунысь Кун Кенешлэн Тӧроезлэн воштӥсез Светлана Кривилёва, Удмурт Элькунысь дышетонъя но тодосъя министрлэсь ужзэ быдэсъясь Андрей Кузнецов, Удмурт Элькунысь йӧскалык политикая министрлэсь ужзэ быдэсъясь Лариса Буранова.

Шуныт кылъёс верам бере, ӝытэз азинтӥзы мадьяр но удмурт эктонъёс. Сое ортчытӥзы венгер ансамбль «Чюррентё» но «Эктон корка» эктонъя студия.