Бигеръёслэн Быдэс дуннеысь конгрессылэн йӧскалык Кенешысьтызы делегация кык нуналлы Удмурт шаере ас ужъёсызъя вуылӥз. Солэн председателеныз, Татарстанысь премьер-министрлэн воштӥсеныз Василий Шайхразиевен пумиськиз Максим Шумихин, асьме элькунысь Тӧролэн но Кивалтэтлэн Администрациеныз кивалтӥсь.

Удмурт Элькунэ вуонлэн валтӥсь ужпумез – шаерысьтымы бигер мерлык огазеяськонъёслэн уженызы тодматскон, калыклэсь аспӧртэмлыксэ утёнлы сӥзем юанъёсты эскерон.

Делегация вуылӥз Ижкарысь черкъёсы, 97-тӥ номеро «Гармония» школаын ужась Х. Фаизханов нимо лицее, 107-тӥ нылпи садэ, М. Джалил нимо лыдӟетъюрт-филиалэ но «Янарыш» газет редакцие .

«Удмуртиысьтымы бигеръёслэн огазеяськонзылы бадӟым саклык висъямды понна быдӟым тау. Тросэз соос пӧлысь уло Ижкарлэн Ленин ёросаз, отын ужа элькун муфтий –– зэмос азьветлӥсь Фаиз – хазрат Мухамедшин. Со аслаз командаеныз бадӟым уж нуэ. Калыкъёслэн эшъяськон юртсы котькинлы шумпотэ. Татын ньыль бигер огазеяськонъёс ужало. Кылсярысь, «Асылъяр» бигер крезьгуръя, кырӟанъя но эктонъя ансамбль. Милемлы туж дуно, тӥ соослы юрттӥськиськоды шуыса. Пиналъёслэн анай-атайёсы туж умой верасько ог-огенызы, ноку но палэнэ уг кылё. Ӵапак калыклэн лулчеберетэныз но сям-йылолъёсыныз «висё». Оскисько, ӵошен асьмеос троссэ быгатомы», – пусйиз Максим Александрович.

Пумиськон улсын кенешизы Ижкарысь Габдулла Тукай нимо 6-тӥ гимназиын тупатъян-лэсьтӥськонъёс пумысен. Отын ог 700 пиналъёсты ӟуч но бигер кыллы дышето. 31 классъёс пӧлысь 10-эз класс бигер кылэз но литератураез дышетэ. Гужем 2022-тӥ аре Удмурт Элькунлэн Тӧроез Александр Бречалов гимназие вуылӥз, соку со Удмурт Элькунысь дышетонъя но тодосъя министрлы Светлана Болотниковалы нимысьтыз вазиськиз, гимназиез капремонтъя федерал программае пыртыны кулэ шуыса. Нош тыршисьтэм подрядчикен пыр-поч кенешыны но тупатъян-лэсьтӥськон ужлэсь мынэмзэ Кивалтэтлы аслыз чакланы косӥз.

Озьы ик кенешизы «Спартак» калыкъёслэн творчествозыя юртэз выльдон пумысен.Ӵектослэн коньдонъя сметаез дасямын ни, история-лулчеберет удысъя экспертиза но ӝоген дась луоз. Собере куноос вуылӥзы Ижкарысь Калыкъёслэн эшъяськон юртазы. Отын соос Бигеръёслэн Быдэс дуннеысь конгрессыя исполкомлэн 2022-тӥ аре ужамезлы йылпумъянъёс лэсьтӥзы но 2023-тӥ ар понна быдэстоно ужъёсты пусйизы.