30-31-тӥ толшоре удмурт егитъёслэн «Шунды» мерлыко огазеяськонзы Марий Эл Элькунысь Бадӟым Карлыган черкогуртысь улӥсьёсты туала удмурт лулчеберетэн тодматозы.

«Шундылэн» кивалтӥсезлэн Ольга Трониналэн ивортэмезъя, бускель улосъёсын, кытын уло удмуртъёс, удмурт лулчеберетлы сӥзем нуналъёс радъясько ини трос аръёс ӵоже, но туэ егитъёс ӵектӥзы пумиськонлэсь кабзэ ӧжытак воштыны. Ужрад нырысь ик школаын дышетскисьёс но егитъёс понна радъямын луоз. Карлыган школаын егитъёс тодматскозы Удмуртиысь ог ёзъёсынызы, соолэн удмурт лулчеберетэз вӧлмытон вылысь кылдытэм ӵектосъёсынызы но кичӧлтонъёсынызы.

Озьы, егитъёс тодматозы «Шунды» мерлыко огазеяськонлэн ужъёсыныз, егитъёс понна потӥсь Dart газетэн, удмурт кылын блог гожъясьёсын но мукет азинлыко кичӧлтонъёсын. Со сяна дышетскисьё журналистикая, дизайнъя, актёр быгатонъёсъя но вераськонэз азинтонъя мастер-классъёсы пыриськыны быгатозы. «Ӟардон» калык ансамбле ветлӥсьёслы эктонъя мастер-класс радъямын луоз. Озьы ик тодматскыны луоз егит суредасьлэн Екатерина Мензариповалэн шаржъёсыныз. Нош ӝыт егит артистъёс: Богдан Анфиногенов, Анна Образцова, фолк-группа Dukes, Константин Никитин, Наталия Бурановя – концерт возьматозы. Ӝытэз нуозы Удмурт Элькунысь йӧскалык театрысь артистъёс – Максим Князев и Надежда Наговицына. Ӝыт йылпумъяськоз этнодискотекаен.

Карлыган аспӧртэмлыко черкогурт. Татын ог-огенызы тупаса уло удмуртъёс, поръёс, ӟучъёс но бигеръёс. Удмуртъёслэн историязы та черкогурт бадӟым инты басьтэ. Татын нырысетӥосыз пӧлын удмурт школа усьтэмын вал. Татын ик дышетскиз нырысетӥез удмурт нылкышно кылбурчи Ашальчи Оки.

Ужрадъясьёс: Удмурт Элькунысь йӧскалык политикая министерство, Калыкъёслэн Эшъяськон юртсы, удмурт егитъёслэн «Шунды» мерлыко огазеяськонзы.

Вань юанъёс вазиськоно таӵе телефонъя: 8 904 837 14 33 – Ольга Тронина ( «Шунды»огазеяськонлэн кивалтӥсез).

.