3-тӥ пӧсьтолэзе 11 егитъёс «Маршрут построен! Удмуртия многонациональная!» нырысетӥ йӧскалыккуспо блог-туре мынӥзы.

Кошкон азязы Калыкъёслэн Эшъяськон юртазы ӵектосэ пыриськисьёсын пресс-конференция ортчытэмын вал.

Ӧнерчиосты ӟечкылазы УЭ-ысь йӧскалык политикая министр Эдуард Степанович Петров, Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Иванович Ураськин, УЭ-ысь туризмъя министр УР Юлия Сергеевна Бадаш, Калыкъёслэн Эшъяськон юртсылэн директорез Юлия Германовна Шахтина.

Арня ӵоже ӵектосэ пыриськисьёс Удмуртиен тодматскозы – калыкъёслэн лулчеберетенызы но сям-йылолъёсынызы, йӧскалык дӥсенызы, улон-вылонэнызы. Тунсыко люкам материалзэс берло видео амалэн поттозы – ивортодэтэз вӧлмытыны.

Ужрад ортчем бере тужгес но мыло-кыдо ужасьлы кузьым дасямын луоз.

Ӵектосэз Калыкъёслэн Эшъяськон юртсы радъя «Росмолодёжь.Гранты», Лулчеберет кичӧлтонъёсъя Президентлэн фондэз, УЭ-ысь йӧскалык политикая министерство юрттэмен.