25-26-тӥ тулыспалэ Сельхозакадемилэн спорткомплексаз Удмурт Элькунысь йӧскалык мерлыко огазеяськонъёс куспын футзалъя IX элькун чемпионат ортчиз. Ужрад Атыкай музъемез утисъёслэн нуналзылы сӥземын вал.

Чемпионат Удмурт Элькунысь армянъёслэн «Урарту» мерлыко огазеяськонзылэн кичӧлтэмезъя ортчиз. Валтӥсь меретэз – пӧртэм выжыысь калыкъёслы ог-огзэс валаны юрттон, эшъяськон кусыпъёссэс радъян, кужмо спортсменъёсты шараян.

Ӵошатскисьёсты ӟечкылазы Удмурт Элькунысь йӧскалык политикая министрлэн воштӥсез Людмила Соковикова но «Урарту» огазеяськонлэн кивалтӥсез » Мнацакан Аракелян. Соос воргоронъёслы тазалык, кужым, азинлык но вормон сӥзизы.

Мини-футболын асьсэлэсь кужымзэс эскерыны таӵе мерлыко огазеяськонъёслэн 13 командазы мылкыд кариз: бигер егитъёслэн «Иман» огазеяськонзы, ӟуч лулчеберетъя огазеяськон, армянъёслэн «Урарту» мерлыко огазеяськонзы, еврейёслэн мерлыко огазеяськонзы, мордваослэн «Умарина» огазеяськонзы, чеченъёслэн «Даймохк» мерлыко огазеяськонзы, таджикъёслэн «Ориён-Тадж» мерлыко огазеяськонзы, грекъёслэн «Никея» мерлыко огазеяськонзы, удмурт егитъёслэн «Шунды» огазеяськонзы. Со сяна, мерлыко огазеяськонъёс «Делин» огъя команда кылдытӥзы. Нырысьсэ таӵе ӵошатсконэ пыриськиз Удмурт кун университетысь ирак студентъёслэн командазы.

Кык нунал ӵоже ӟырдыт вожвылъяськон мынӥз. Чемпион ним басьтӥз мерлыко огазеяськонъёслэн «Делин» огъя командазы. Кыкетӥ интые потӥз грекъёслэн «Никея» мерлыко огазеяськонзылэн командаез. Куинетӥ интыын – бигер егитъёслэн «Иман» огазеяськонзылэн командазы. Чемпионатэ пыриськись командаос пусъемын дипломъёсын, нош вормисьёс – кубокен но кузьымъёсын.

«Урарту» мерлыко огазеяськонлэн кивалтӥсезлэн Мнацакан Аракелянлэн верамезъя, турнир туж тунсыко пӧрмиз. Котькуд команда футболэн шудыны быгатэмзэ возьматыны тыршиз. Но, таӵе ужрадъёсын вормон валтӥсь уг луы, валтӥсез – ӵошатсконэ пыриськон.

.