21-тӥ пӧсьтолэзе Калыкъёслэн Эшъяськон юртазы Удмурт Элькунысь йӧскалык политикая министр бордысь ялан ужась кенеш ортчиз.

Кенеш радын Удмурт Элькунлэн Тӧроез Александр Васильевич Соловьёв мерлыко огазеяськонъёслэн кивалтӥсьёсынызы пумиськиз. Пӧртэм пуштросо юанъёс сётэмын вал Тӧролы, кылсярысь: ивор вӧлмытӥсь сӧзнэтъёслэн ужзы, кӧчылон политикае воштонъёс пыртон, Ижкарлэн азинтиськонэз сярысь но мукет.

Йӧскалык политикая министерство ялан ужась кенешаз ӵемысь ӧтьылэ кун тӧрлык ёзэсъёслэсь кивалтӥсьёссэ. Кылемаз таӵе пумиськонэ Удмурт Элькун Тӧролэн но Кивалтэтлэн Администрациезлэн Кивалтӥсез Андрей Иванович Гальцин вуылӥз. Со вераз Уфаын ортчем кенеш сярысь.

Удмурт Элькунысь йӧскалык политикая министр Л.Н. Буранова ортчытэм йӧскалык шулдыръяськонъёслы (ӟуч «Масленица», пор «Семык», бесерман «Корбан», бигер «Сабантуй», удмурт «Гербер») йылпумъянъёс лэсьтӥз. Озьы ик калык шулдыръяськонъёсыз азьланьтоз эшшо одӥгез «Гербер», кудӥз нырысьсэ ортчоз Москваын (25-тӥ пӧсьтолэзе), арямян «Вардевар», но удмурт «Выль» калык юмшанъёс. Тодмостыны кулэ вань та шулдыръяськонъёс туннэ нуналэ йӧскалыккуспо луэмын ини шуыса, угось пӧртэм йӧслыко калыкъёс шумпотыса пырисько мукет калыкъёслэн праздниказы.

Л. Н. Буранова озьы ик ивортӥз выль кылдэм Йӧскалык ужъёсъя агентстволэн кивалтӥсеныз но ӧнерчиосыныз пумиськемез сярысь. Татын верам вал асьмелэн элькунмы йӧскалык политикалэсь азинтӥськонзэ, кун йӧскалык стратегиез быдэстонэз лыдэ басьтыса 10 тужгес но умойёсыз улосъёс пӧлы пыре шуыса.

Министерстволэн но Калыкъёслэн Эшъяськон юртсылэн ӧнерчиосыз ялан тыршо тодон-валанзэс, быгатонзэс будэтыны. Соин сэрен радъямын вал Татарстанысь Калыкъёслэн Эшъяськон юртэнызы тодматскон. Азьланяз таӵе пумиськон ортчытыны малпамын Пермын.

Озьы ик кенешын Удмурт Элькунысь йӧскалык политикая министрлэн воштӥсез Л.Ю. Соковикова мерлыко чектосъёсъя вожвылъяськонлы йылпумъян лэсьтӥз. Жаляса верано луэ, заявкаос ӧжыт сётэмын, соин ик вожвылъяськон азьланьтэмын луоз.

Пумиськонлы йылпумъянъёс лэсьтыса, Л.Н Буранова ивортӥз на вуоноез пумиськон куарусён толэзе радъяськоз шуыса. Та дырлы дасямын луозы Калыкъёслэн Эшъяськон юртазы Ванёсъёсъя центр кылдытон пумысен ужкагазъёс. Озьы ик Удмуртиысь калыкъёслэн ассамблеязылэсь нырысетӥ отчамзэ ортчытон дыр сярысь юан эскериськоз.