22-23-тӥ тулыспалэ элькунысьтымы мерлыко огазеяськонъёслэн командаоссы кужымзэс эскерозы мини-футболъя VI йӧскалыккуспо элькун чемпионатын.

Чемпионатэз радъяло: Удмурт Элькунысь йӧскалык политикая министерство, Калыкъёслэн эшъяськон юртсы, Удмурт Элькунысь армянъёслэн «Урарту» мерлыко огазеяськонзы.

Ӵошатсконэз усьтоз «Эшъяськонлэн Кубокез» понна нюръяськон. Татын кужымзэс мерталозы 3 командаос: мерлыко огазеяськонъёслэн кивалтӥсьёссылэн командазы, Удмурт Элькунысь кунпуш ужъёсъя министерстволэн командаез но Суд приставъёсъя федерал службалэн Удмурт Элькунысь кивалтонниезлэн командаез. «Эшъяськон кубоклэн» кузёез шараяськем бере ӵошатсконэз азьланьтозы мерлыко огазеяськонъёслэн командаоссы. Туннэ нунал понна 13 команда заявка сётӥз.

Шудон кыстӥське 2 тайм, котькудӥз 10 минутэн. Судьяос асьсэос быръё кыӵе команда кудӥныз шудоз. Тужгес но трос очко басьтӥсь команда вормисе потэ.