5-тӥ куартолэзе Удмурт Элькунысь йӧскалык политикая министерствоын министр бордын ялан ужась кенеш люкаськиз. Татчы пыриськизы мерлыко огазеяськонъёслэн ёзчиоссы, министерствоысь но Калыкъёслэн Эшъяськон юртысьтызы ӧнерчиос.

Кенешлэн кутсконаз кыл сётӥськиз Наркотикъёсты вӧлмытонэз эскеронъя Россия Федерациысь федерал службалэн Удмурт Элькунъя кивалтонниысь ёзэтэн кивалтӥсьлы Татьяны Александровна Романовалы. Татья Аналександровна вераз элькунамы наркотикъёсын герӟаськем огъя югдур, кышкытлыкъёс но профилактика сярысь.

Кенешез азьланьтӥз йӧскалык политикая министр Лариса Николаевна Буранова. Со пусйиз но тау кариз мерлыко огазеяськонъёсысь ёзчиослы таӵе кулэлыко ужрадъёсы мыло-кыдо пыриськемзылы: Россия Федерациысь Мерлыко палатаын Удмурт Элькунлы сӥзем нуналъёс, Йӧскалык ужпумъёсъя федерал агентствоын но Россия Федерациысь Кун Думаын пумиськонъёс, «Спорт.Туризм.Отдых» адӟытон.

Лариса Николаевна нимысьтыз вераз на Быдӟым Вормонлы сӥзем ужрадъёс сярысь.

6-тӥ куартолэзе 13.00 часэ Калыкъёслэн Эшъяськон юртазы Быдӟым Вормонлы сӥзем концерт радъяськоз.

8-тӥ куартолэзе Железнодорожник лулчеберет юртэ ӧтемын мерлыко огазеяськонъёслэн ветеранъёссы. Ужрадэз ортчытэ Таджикъёслэн мерлыко огазеяськонзы.

9-тӥ куартолэзе 9.00 часэ мерлыко огазеяськонъёслэн ёзчиоссы Быдӟым Атыкай оже ветлэмъёсты буре вайыса, Котьку жуась тыл доры сяська понон ужрадэ пыриськозы.

14-тӥ куартолэзе Калыкъёслэн Эшъяськон юртазы мерлыко огазеяськонъёслэн ёзчиоссы понна шашкиосъя но нардыя ӵошатскон радъяськоз.