Удмурт Элькунысь министерствоос но ведомствоос спортлэн пӧртэм удысъёсызъя ог-огзылэсь кужымзэс эскеризы. Тол спартакиадалэн программаяз пӧртэм ӵошатсконъёс пыризы: гын сапеген хоккей, лымы вылын волейбол, тол трейл, куасэн бызьылон, уян, гурезь куасъёсын нискылан, шулдыр стартъёс, кёрлинг, канатэз кыскон.
Миннацысь команда ассэ сӥё-дано возьматӥз. Лымы вылын волейболъя 10 команда пӧлысь йӧскалык политикая министерствоысь ужасьёс нырысетӥ инты басьтӥзы! Тыршыса шудэмзы понна тау кылъёс веарськом УЭ-ысь йӧскалык политикая министрлы Эдуард Петровлы, Уракбаева Мальвиналы но Короткина Екатериналы.
Сергей Огородников – мониторингъя но йӧскалык кусыпъёсты эскеронъя ёзэтлэн кивалтӥсез – куасэн бызьылонын кыкетӥ инты басьтӥз! Канат кысконъя ӵошатсконын вормон интыез басьтон понна Миннацысь командалы кӧня ке гинэ ӧз тырмы.
Таин гинэ ӧз на быры! Бадӟым дасяськон кутскиз гужем спартакиадалы!
«Туннэ ужрадэ пыриськон но солэн йылпумъянъёсыз возьмато командалэсь ӵош ужамзэ, тыршемзэ. Мон котькудэныды данъяськисько но шумпотӥсько выль вормонъёстылы. Ваньдылы тау спартакиадае пыриськемды понна. Асьмеос – команда!», – ӟечкылаз УЭ-ысь йӧскалык политикая министр Эдуард Петров.