10-тӥ куартолэзе Калыкъёслэн Эшъяськон юртазы Егитъёслэн XIV Калыккуспо «Минск- Нижний Новогород – Чебоксары – Казань – Елабуга – Ижевск» легкоатлетической акцизылэн оргкомитетэныз пумиськон радъяськиз. Арлы быдэ ортчись ужрад сӥземын Быдӟым Вормонлы, ортчытӥське Беларусь Элькун но Удмурт Элькун вискын кутэм тупанкылэз быдэстон улсын.

Куноосын пумиськизы Удмурт Элькунысь йӧскалык политикая министрлэсь ужзэ быдэсь Л.Н. Буранова, Калыкъёслэн Эшъяськон юртсылэн кивалтӥсез Т.П. Боталова, «Удмурт Элькунысь белорусъёслэн «Батьковщина» мерлыко огазеяськонзылэн кивалтӥсез Н.Д. Украинец, Техникая Ижкарысь кун университетлэн ректорезлэн воштӥсез А.Ушаков. Люкаськемъёслы капчи мылкыд кузьмаз калык эктонъя но кырӟанъя «Танок» Удмурт Элькунысь кун ансамбль.

Куноос тодматскизы Калыкъёслэн Эшъяськон юртэныз, мерлыко огазеяськонъёслэн уженызы но куд-ог ӵектосъёсынызы. Бызьылон акцие пыриськисьёс понна чакламын нимысьтыз программа. Соос вуылозы на М.Т. Калашников нимо ыбылиськон ожтӥрлыкъя музее, Г.А. Кулаковалэн музей-юртаз, П.И. Чайковскийлэн музей-юртаз, архитектурая но этнография «Лудорвай» музее но Ижкарысь зоопарке.