15-тӥ куарусёнэ Удмуртиысь Калыкъёслэн Эшъяськон юртсы пӧрмиз аспӧртэм площадкалы, кытын Россилэн улосвылъёсысьтыз интыя аскивалтэт ёзъёсысь огмуртъёс ог-огзылы асьсэлэн азинсконъёссы, люкам опытсы сярысь веразы.

«Мир в диалоге» форум «Марафон Дружбы» нимо ужрадлэн берпуметӥ вамышез луиз, кудӥз Удмурт Элькунысь Калыкъёслэн Эшъяськон юртсылэн 15 ар тырмонэзлы сӥземын.

15 ар талэсь азьло Калыкъёслэн Эшъяськон юртсы пумиськон инты луиз пӧртэм лулчеберетъёслэн, сям-йылолъёслэн но малпанъёслэн огинэ вуонзылы. Лыдтэм трос ӵектосъёс, кудъёсыз татын ортчытэмын, юртто йӧскалыккуспо валче ужанэз, лулчеберет куспын воштӥськонъёты азьланьтыны но росиякуспо граждан идентичностез юнматыны.

«Мир в диалоге» форум пыриськисьёслы луонлык сётӥз йӧскалык политика удысысь азинлыко муниципал ужъёсты вань страналы адӟытыны. Куноос, ужъюлтошъёссылэсь люкам опытсэс эскерем сяна, экспертъёслэсь визь-кенеш басьтӥзы.

Таӵе паськыт ужрадлэн азьмугез – ёросъёслэн мунициапал кылдытэтъёсысьтызы огмуртъёслэсь тодон-валанлыксэс (компетентностьсэс) будэтон, кудӥз герӟаськемын этносъёс вискысь кусыпъёсты умоятонэн. Форумлэн мукет ужпумез – субъектъёс вискын кун йӧскалык политикаез улонэ пыӵатон кусыпъёсты муромытон.

«Мир в диалоге» нимо форуме пыриськизы Россиысь каръёслэн, ёросъёслэн, гуртъёслэн кивалтэтъёсысьтызы ужасьёс. Озьы ик пыриськисьёс пӧлын – дышетон, лулчеберет, егитъёслэн политиказы удысъёсын ужасьёс, кудъёсыз кун йӧскалык политикаез улонэ пыӵатон бордын тыршо, асьсэ муниципал кичӧлтэмъёссылэн но этнокультурной ужъёссылэн авторъёссы. Озьы ик куноос пӧлын Киров но Новосибирск улосвылъёсысь, озьы ик Саха (Якутия) но Татарстан Элькунъёсысь, Москваысь ужудысчиос вал.

Куноосты Удмурт Элькунысь йӧскалык политикая министр Эдуард Петров ӟечкылаз. Озьы ик ӟеч кылъёссэс веразы Удмуртиысь Кун Кенешлэн председателез Владимир Невоструев, Удмурт Элькунысь Тӧро но Кивалтэт Администраци кивалтӥсьлэсь ужзэ быдэсъясь Александр Журавлев, Генеральной секретарьлэн нырысетӥ воштӥсез – Россиысь Еврази калыкъёслэн Ассамблеязылэн Генеральной секретариатлэн кивалтӥсез, Россия Федерациысь Президентэз азьын йӧскалык кусыпъёсын Советлэн ёзчиез Светлана Смирнова. Россиысь калыкъёслэн юртсылэн кивалтӥсезлэн советникез Наталья Альтнер лыдӟиз Анна Полежаевалэсь ӟечкылан гожтэтсэ.

Россиысь Кун Думаысь депутат но Комитетлэн ёзчиез Лариса Буранова: «Мон шумпотӥсько, форум, кудӥз 2018-тӥ арын Удмуртиын вордӥськиз, азьланьтӥське шуыса, федерал но улос экспертъёсты но ваньзэсты, кинлы кулэ луэ вачевераськон кусыпъёсты возьыны но йӧскалык валче уж нуыны, люка шуыса. «Мир в диалоге» – малпанъёсын но опытэн вошъяськон синпӧртмо площадка сяна, со эшшо эшъёсын ог-огенызы пумиськон инты – выльзэ утчасьёс, усточиос, азьмынӥсьёс, мер улонын асьсэды етӥз возись адямиос но кивалтонын ужасьёс. Куке одӥг площадкаын таӵе трос тунсыкъяськись адямиос люкасько, улосъёс куспын умой герӟетъёс юнмало, огинын ӵектосъёс кылдо, кудъёсыз сӥньыс выллем ёросъёсты герӟало, асьме калыкъёсты огазеяло.»

Удмурт Элькунысь Калыкъёслэн Эшъяськон юртэзлэн тӧроез Юлия Германовна Шахтина «Векторы взаимодействия в укреплении общественного согласия и общенационального единства» нимо панель амалэн вераськон ортчытӥз. Отчы пыриськизы Удмурт Элькунысь нимысьтыз ожгар операцие пыриськисьёслы юрттэтъя «Защитники Отечества» нимо филиаллэн кивалтӥсез Максим Шумихин, «Удмурт Элькунысь егитъёслэн центрзы» нимо ужъюртлэн кивалтӥсез Максим Файзулин, Лариса Буранова и Светлана Смирнова.

Форумын озьы ик ортчиз чеберлыко пусъем конвертлэн сӥё-дано ужрад памятной спецгашениез, кудӥз Ашальчи Окилэн 125 ар тырмонэзлы сӥземын. Конвертэ нимысьтыз штемпель пуктонэз ортчытӥзы Россиысь Почта но Удмурт Элькунысь йӧскалык политикая министерство. Эдуард Петров: «Аслаз кылбуръёсыныз но прозаеныз со Удмуртиез данэ поттӥз. Солэн кылдытос ужез быдэс музъем вылын тодмо луэ – кылбуръёсыз трос кылъёсы берыктэмын. Акилина Григорьевна нырысетӥ удмурт поэтесса сяна, Удмурт Элькунысь сӥё-дано эмчи но».

Секциослэн ужзы форумез азьланьтӥз, ваньмыз соос асьме странаысь кун йӧскалык политика удысысь асдыръем кысык юанъёсты улонэ пыӵатонлы сӥземын. Этносъёс куспын вачевераськонэз но ӵош ужанэз азинтон удысын Калыкъёслэн Эшъяськон юртъёссылэн луонлыкъёссы сярысь кенешыны луиз Россиысь калыкъёслэн юртсылэн огмуртъёсыныз. Россиысь калыкъёслэн Ассамблеязы огазеяськонзылэсь росиякуспо идентичностез юнматон удысын луонлыксэс возьматӥз. Со сяна этнобрендъёсты адӟытӥзы, кудъёсыз этносъёс куспын соглаш луонлы юртто.

Удмурт Элькунысь Калыкъёслэн Эшъяськон юртсылэн 15 ар тырмонэзлы сӥзем «Марафон Дружбы» нимо сӥё-дано ужрадлэн йылпумъяськонэзлэн берпуметӥ вамышез – йӧскалык-лулчеберетъя огазеяськонъёслэн парадзы, фольклор ансамбльёслэн кырӟам-эктэмзы, Калыкъёслэн Эшъяськон юртъёссылы ӟечкыланъёс но тау карон кылъёс, озьы ик ужасьёссэс данъетан: синпӧртмо интылэн азинскемез понна тау карон, угось ваньмыз та Удмурт Элькунысь йӧскалык кусыпъёслы юн луыны юрттэ.