Кык ужан нунал, куинь тематической секция, ог сю доклад, 300 пыриськись – Саранскын ортчиз финн-угор калыкъёслы сӥзем II Россиякуспо форум. Кыкетӥ ползэ ни Россиысь нациосты огазеянъя, кылъёсты, лулчеберетэз, сям-йылолъёсты утёнъя, азинтонъя площадка быдэс шаерысьтымы куноосты люка.

Ужрадэ 35 улосвыл пыриськиз. Удмурт Элькунлэсь данзэ 23 адями утиз. Соос пӧлын быдэсъясь но каткылдытӥсь тӧрлыкысь, этнокультурной мерлык, эскерет, тодос огазеяськонъёсысь, дышетон но лулчеберет ужъюртъёсысь огумуртъёс.

Шаерысьтымы тунсыкчиос пӧртэм направлениосын (ӧръёсын) докладъёсынызы тодматӥзы. Филологи тодосъёсъя доктор, Удмурт кун университетысь Удмурт кылосбуръя, финно-угроведениея но журналистикая институтысь огъя но финн-угор кылтодонъя кафедралэн профессорез Наталья Кондратьева РФ-ысь калыкъёслэсь истори-лулчебертъя кылзэс утён пумысь дышетон системалэн луонлыкъёсыныз тодматӥз. Калыкъёслэн Эшъяськон юртысьтызы методистэз, удмурт кылын «Даур ТВ» нырысетӥ интернет-телеканаллэн авторез Богдан Анфиногенов удмурт кылэз утён удысын IТ-ӵектосъёсты лэсьтон сярысь ивортӥз. Россиысь Нырысетӥ Президент Б.Н. Ельцин нимо Уральской федерал университетысь студент Егор Лебедев краудсорсингез уже кутыса параллельной корпус кылдытонэн тодматӥз.

Вань удмуртъёслэн «Удмурт кенеш» улосвылкуспо мерлыко огазеяськонлэн тӧроез, Удмурт Элькунысь Кун Кенешысь лулчебертъя, туризмъя но йӧскалык политикая ялан ужась ӧрилэн кивалтӥсез Андрей Ураськин тема бырйиз, кудӥз герӟаськемын улосвылысь этнокультурной лулпуш узырлык объектъёсты утёнэн но азинтонэн. Эшшо одӥг секция быдэсак ӵектосъёслы сӥземын вал. Калыкъёслэн Эшъяськон юртысьтызы кивалтӥсьлэн воштӥсез Алина Чернова медиа удысын этнокультурной проектъёсты лэсьтонъя уж сярысь мадиз. Дышетон удысысь йӧскалык ужпумъёсты эскеронъя тодос институтлэн директорез Надежда Ураськина «Удмурт Кылдунне» ивортодэт-дышетон портал сярысь вераз. Удмурт егитъёслэн «Ресурсный центр «Куара» улосвыл мерлык огазеяськонлэн проекной менеджерез, медиа ӵектосъёслэн но клипъёслэн линейной продюссерез Степанова Ольга «Этнические организации в современном медиапространстве: кейсы молодёжной организации «Куара» нимо тематической сессия ортчытӥз.

Форум улсын коммерциен герӟаськымтэ огазеяськонъёслэн егитъёслы сӥзем ӵектосъёсъя вожвылъяськонзы ортчиз. Кичӧлтонъёссэс келяны вань мылкыд карисьёс быгато вал. Таяз аре 36 заявка вуиз, соос пӧлысь11-ез нимысьтыз данъетамын. Богдан Анфиногеновлэн удмурт кылын «Даур ТВ» нырысетӥ интернет-телеканал ӵектосэз I степенё дипломен пусъемын вал. Марина Кунавина, «Удмурт выжыкыл» ӵектослэн кивалтӥсез, кытын школаын дышетскисьёс пластилинлэсь выжыкыл геройёсты лэсьто но соосты удмурт кылын вераськыто, II степенё диплом утӥз.

Ужрадлэн пумаз резолюция кутэмын вал. Та ужкагазэн тодматозы улосвылъёсысь Тӧроосты, кытын финн-угор калыкъёс уло. Озьы ик, федерал министерствоослы но ведомствоослы ӵектонъёс дасясько.