22-тӥ пӧсьтолэзе Россилэн шоркараз, Москваын, Гербер шулдыръяськон ортчиз. Туэ праздник Футболъя дунневыл чемпионатлы сӥземын вал, соин ик валтӥсь девизэз но «Удмуртия заряжает!». Площадкаос люкемын вал куиньлы: элькунмылэсь туризм, спорт удысъёсын азинтӥськонъёссэ но инвистициосты кыскыны быгатонлыксэ возьматон.

Фестивалез сӥё-дано усьтӥз Удмурт Элькунысь Кивалтэтлэн Тӧроезлэн воштӥсез, Удмурт Элькун Тӧролэн Россия Федерацилэн Президентэз бордысь быръем адямиез М.В. Хомич. Аслаз вазиськоназ Михаил Викторович пусйиз, шулдыръяськонэ арысь-аре тросгес калык вуэ шуыса. Тау кариз Удмуртиысь лыктэм коллективъёслы, ужбергатӥсьёслы, Москвалэн Кивалтэтэзлы, кудъёсызтэк та шулдыръяськон ӧй ортчысал.

Москваысь кивалтэтлэн нимыныз калыкъёсты ӟечкылаз йӧскалык политикая но улосвыл кусыпъёсъя департаментлэн кивалтӥсез Дмитрий Утлюков: «Москваын Гербер шулдыръяськонэз ортчытон ӟеч сямлы пӧрмиз ини. Ужрад ортче Москва Кивалтэтлэн но Удмурт Элькун Кивалтэтлэн юрттэменызы, со вера улосъёслэн ӟеч кусыпъёссы сярысь. Удмуртиысь калыклы Москалэн Кивалтэтэзлэсь самой ӟеч сӥзёнъёс верасько».

Люкаськем калыкез озьы ик ӟечкылаз Россиысь Госдумалэн депутатэз Валерий Бузилов.

Удмурт Элькунын туэ тулыс «Мынам Удмуртия» туспуктэмъёсъя вожвылъяськон ортчиз. Вожвылъяськонэ 10 000-лэсь ятыр туспктэмъёс вуизы. Вормисьёслэн ужъёссы Москвае адӟытонэ но вуизы.

VR/AR-лаборатория Boxglass компания возьматӥз куасэн ветлон тренажерзэ. Виртуальной трасса котькуд мылкыд карисьлы юрттӥз ассэ «Нечкино» курортысь гурезьёсысь нискыласен шӧдыны. Гурезьысь гылӟыкузы соос нимысьтыз коньдон – «удмурткоин» – бичазы. Тужгес но трос коньдон люкасьёс Нечкиноын быдэс нунал дунтэк шутэтскон утӥзы.

Удмуртиысь туризмъя ивортодэт центр 4 турист маршрутэн тодматӥз: военно-промышленной, «Сизьым шуръёс» – Удмуртилэн шуръёсыз, «Удмуртия – П.И. Чайковскийлэн вордӥськем шаерез» но спортивной.

Егит куноосын Александр Морозевич, шахматъя Россиысь кык полэс чемпион, одӥг дыре шудон сеанс ортчытӥз. «Туж шумпотымон шахматэн тунсыкъясько шуыса, тужгес но пиналъёс. Соос пумозяз нюръяськизы, тунсыко ходъёс малпаллязы. Оскисько, Удмуртиын шахматъя школа зол шуыса, шудомы на!» – вераз аслэсьтыз мылкыдъёссэ Александр Морозевич.

«Торпедо-Ижевск» футболъя кышномурт клуб настольной футболъя турнир ортчытӥз, футболъя мастер-класс возьматӥз.

Шулдыръяськонэ лыктэм котькуд адями аслаз мылкыдэзъя уж шедьтӥз, угось пӧртэм площадкаос ужазы: калык шудонъёсъя, эктонъя, кырӟанъя, киужъёс лэсьтонъя мастер-классъёс, калык сиён-юонъёсты оскалтон но мукет. Радъясьёслэн малпамзыя, шулдыръяськон усто ортчиз.