Москваын Россиысь лулчеберетъя но дышетонъя «ЭТНОМИР» центрын Удмуртилэн представительствоез луоз. Элькун тӧролэн но кивалтэтлэн пресс-службазы ивортэмъя, улосвыл но «ЭТНО-Деревня» компания куспын тупанкыл 1-тӥ инвожое Петербургысь экономикая калыккуспо форумын юнматэмын.

Али парк-музейлэн интывылаз Дальний Востокысь, Сибирьысь, Россилэн шор люкетысьтыз, Украинаысь, Белоруссиысь но мукет интыосысь улон-вылонэз возьматӥсь площадкаос радъямын. Центре вуылӥсьёс ӝоген тодматскыны быгатозы Удмуртилэн но лулчеберетэныз. Йӧскалык азбарын луозы музей, йӧскалык сиён-юонъёсын кафе, кунокуа, презентациос но конференциос ортчытъян залъёс. Объектъёсты улосвылысь архитектуралэсь аспӧртэмлыксэ лыдэ басьтыса пуктозы. “Аслэсьтыз «бренд-буксэ» али гинэ кылдытӥсь Удмуртилы ассэ возьматон понна выль площадкаос кулэ, тужгес но «ЭТНОМИР» выллем азинлыкоосыз. <…> 2016-тӥ арын «ЭТНОМИРе» 1 миллион 700 адями ветлӥз.” – вера Александр Бречалов. Тупанкылъя, Удмуртилэсь экспозицизэ кылдытонъя ужанрадлыкез 10-тӥ инвожоозь дасяны кулэ.

Улосвыл тӧролэсь ужзэ огдырлы быдэсъясь Александр Бречалов кичӧлтэмъя, Удмуртиын «ЭТНОМИР» центрлэн ыстэм муртъёсыныз ӵош этногурт кылдытэмын луоз. Музейысь ӧнерчиос бизнес-ӵектосэз кылдытыны юрттозы. «Этногуртэз кылдытон инты но солэн учкетэз эскерисько. Йӧскалык огазеяськонъёс ласянь ӵектонъёс вань — гуртын 20 пала юртъёс-экспозициос кылдытыны, котькдуӥз со элькунын улӥсь выжы калыкъёслэсь йылолъёссэс но аспӧртэмлыкъёссэс возьматоз. <…> Улосвылын тупаса уло 130 выжы калыкъёс. Азьланяз асьмелэн этногуртмы пӧртэм калыкъёслэсь кусыпъёссэс юнматон концепциез возьматӥсь бадӟым, федерал ӵектос луыны быгатоз», — пусйиз Александр Бречалов.

Солэн верамезъя, выль ӵектос инвестициосты кыскыны выль инты луыны быгатоз.

Ивор кутэмын: https://udmurt.media/udm/news/kultura-i-turizm/20253/