5-тӥ гудырикошкон толэзе Можга ёросын, Сюга шур дурын («Свет» профилакторий котырын), удмурт калыклэн выль ю-няньлы но бакча сиёнъёслы сӥзем «Выль» элькун шулдыръяськонэз ортчоз. Ужрадлэн валтӥсь меретъёсыз луо – удмурт калыклэсь лулчеберетсэ, сям-йылолъёссэ утён, удмурт лулчеберетэз вӧлмытон, егитъёслы калык сямъёсты пыӵатон.

Та нуналэ Сюга шур дуре Выльгурт пуксёз. Татын вузкарон-адӟытон радъяськоз. Басьтыны луоз йӧл, чечы, сӥль, чорыг, бакча сиёнъёс но емышъёс. Со сяна, котькуд ульчаын мастер-классъёс ортчозы.

Радъясьёс таӵе азбаръёслэсь ужзэс чаклазы: «Выль крезьгур» – кырӟан-шулдыръяськон азбар;«Быгылес сяртчыос» спорт шудон-ӵошатсконъёсын азбар; «Кӧжыпогъёс» нылпиослы но анай-атайёслы азбар; «Азвесь сюрло» – кузпалъёслэн вожвылъяськон азбарзы; «Быдэ вуон» – быдэ вуэм нылъёслы но пиослы шудон-серектонъёс; «Паймымон емышъёс» аспӧртэмлыко бакча сиёнъёсын но емышъёсын адӟытон; «Бакча сульдэр» – бакчаысь сульдэръёслэн вожвылъяськонзы.

Шулдыртозы калыкез тодмо артистъёс но коллективъёс.