5-тӥ гудырикошконэ Можгакарын котькуд ар ортчись «Выль» праздник радъяськиз.

Пыриськисьёслы но лыктэм куноослы ӟечкылан кылъёсын вазиськиз УЭ-ысь йӧскалык политикая министр Эдуард Петров.

Удмурт Элькунысь сяна, празднике мылысь-кыдысь пыриськизы Башкортостанысь но Кировысь улосчиос.

Арысь аре трос тунсыкчиос кужымзэс но мылкыдзэс сёто та ужрадэз ортчытон понна. Шаерысьтымы эктонъя но кырӟанъя удмурт коллективъёс фольклорен но удмурт лулчеберетэн тодматӥзы. Озьы ик, радъямын вал мастер-классъёс, йӧскалык шудонъёс, вожвылъяськонъёс, спорт нюръяськонъёс. Бадӟым саклык висъямын вузкарон-адӟытонъёслы, кытын элькунысьтымы гурт возёс сиён-юонъёсты возьматӥзы.

Праздниклэн тужгес валтӥсь вакытэз – ӝук пӧсьтон. Туэ 22 пурты пӧсьтӥзы.

Шӧдске, ужрадэн тунсыкъяськисъёслэн лыдзы будэ шуыса. Котькуд ар ог сюрс адями лыктэ та нуналэз пусйыны, удмурт лулчеберетэн но сям-йылолъёсын тодматскыны. Шумпотымон, соос пӧлын удмуртъёс сяна, мукет калыкъёс но вань.