17-тӥ пӧсьтолэзе Можгакарын нырысьсэ Удмурт Элькунысь йӧскалык политикая министерстволэн юрттэмез улсын армян калыклэн «Вардавар» улосвылкуспо шулдыръяськонэз ортчиз.

Празднике вуизы Кизнер, Пичи Пурга, Можга ёросъёсысь, Глазкарысь но Ижкарысь делегациос.

Куноос понна дасямын вал яркыт, шулдыр концерт. Спорт ӵошатсконъёс юнгес огазеязы калыкез. Воргоронъёс канат кыскизы, гир ӝутказы, армрестлингын кужымзэс эскеризы.

«Армения глазами детей» вожвылъяськонэ пыриськисьёслэн суредъёссы паймытӥзы жюриез. Угось соос сюлме пырымон возьматыны быгатӥзы Армениез. Удмурт Элькунысь армянъёслэн «Урарту» огазеяськонзылэн кивалтӥсез М.М. Аракелян ужъёсты Ижкаре армян лулчеберетъя музее нуиз.

Туспуктэм: Александр Горошников, Марина Змеева, Грак ёрослэн «Сельская новь» газетэз.