6-7-тӥ куарусён толэзе Удмуртиын «Мултан ужлэн» йылпумъяськем дырысеныз 120 ар тырмонэзлы сӥзьыса, «Мултанский процесс (1892-1896): испытание духа, чести и достоинства удмуртского народа» нимо научно-практической конференци радъяськоз.

Кык нунал ӵоже конференцие пыриськоз 150-лэсь трос адями. Соос пӧлын студентъёс, дышетӥсьёс, музейёсын ужасьёс, тодмо тодосчиос, профессоръёс. Чакламын лыдӟыны 20-лэсь трос докладъёс.

Конференциез усьтон, пленарной заседание радъяськоз Калыкъёслэн эшъяськон юртазы. Тодосчиослэн докадъёссы таӵе темаослы сӥземын луозы: «Мултан ужлэн» историын кулэлыкез, калыкъёслэн кусыпъёссы, дышетон удыслэн азинтӥськемез, шаертодон но история, литература но искусство.

Кылсярысь истори тодосъёсъя доктор, Россиысь тодосъёсъя академилэн профессорез, Истоияя, кылъя но литературая удмурт институтлэн директорез А.Е. Загребин «Мултан ужлэсь» историын кулэлыксэ сэрттоз-пертчоз, возьматоз, кинъёс но кызьы та ужез XX даурын эскеризы. Санкт-Петербургысь Россиысь тодосъёсъя академилэн библиотекаысьтыз тодосчи В.А. Клишева XVIII даыурын киын лэсьтэм каратос вылэ инъяськыса мадёз Ватка но Кам шуръёс котырысь музъем вылын пӧртэм калыкъёслэн улыны но ужаны кутскемзы сярысь.

7-тӥ куарусёнэ конференци ужзэ азинтоз Кизнер ёросысь Короленко черкогуртын. Программаын чакламын В.Г. Короленко нимо мезее, Успенской черке ветлон. Удмурт йӧскалык театрысь артистъёс М.П. Петровлэн «Вуж Мултан» романэзъя пуктэм «Старый Мултан» спектакль возьматозы.

«Конференция ортчытӥське элькунысьтымы калыкъёслэн лулчеберетсы но инмарлы осконзы сярысь тодон-валанэз вӧлмытон муген, «Мултан уж» вылын пӧртэм выжыысь калыкъёслэсь куспазы тупаса но ог-огзэс валаса улэмзэс возьматон, сыӵе улон радэз туала улонэ пыӵатон вылысь.» – валэктэ Удмурт Элькунысь йӧскалык политика министр Л.Н.Буранова.

Ужрадлэн ортчон дырыз но интыез:

6-тӥ куарусён, Калыкъёслэн эшъяськон юртсы, кутсконэз 10.00 часэ.

7-тӥ куарусён, Короленко черкогурт но Кизнер каргурт.