Удмурт Элькунысь муниципал кылдытэтъёслы калыкъёслэсь кусыпъёссэс но ог-огзэсты валанзэс азинтыны юттӥсь ӵектосъёсты быдэстыны субсиди сётонъя вожвылъяськонлы йылпумъянъёс лэсьтэмын.

Тодады вайытӥськомы, коньдон висъяськиз «Россиын улӥсь калыкъёслэсь кусыпъёссэс юнматон но лулчеберетсэс азинтон (2014-2020-тӥ аръёс)» нимысьтыз ужась федерал кун программаез но «2013-2020-тӥ аръёсы йӧскалыкъёслэсь кусыпъёссэс юнматон но мерлыко улонзэс азинтон» Удмурт Элькунысь кун программаез быдэстон улсын. Вожвылъяськонлэн валтӥсь мугез: интыысь кивалтэтлы калык кусыпъёсты радъяны, эстремизмлы но терроризмлы пумит нюръяськыны юрттон.

Ужъёсты дунъякузы эскерисьёс нимысьтыз саклык висъязы ӵектослэн трос адямиослы, тужгес но быдэ вуымтэослы, пыриськыны луонлык кылдытэмезлы, озьы ик мукет кунъёсысь кӧчем адямиослы асьме шаерамы улыны юрттэмезлы.

12-тӥ гудырикошконозь Удмурт Элькунысь йӧскалык политикая министерствое 30 каръёсысь но ёросъёсысь 18 ӵектос вуиз. Озьыен, малпам ужрадъёссэс улонэ пыӵатыны быгатозы Дэри, Кияса,Эга, Якшур-Бӧдья, Сарапул, Глаз, Балезино ёросъёс но Можга но Сарапул каръёс.

Вожвылъяськонлэн кичӧлтӥсьёсыз но радъясьёсыз – Удмурт Элькунысь йӧскалык политикая министерство но Калыкъёслэн Эшъяськон юртсы.