16-тӥ пӧсьтолэзе Удмурт Элькун Тӧролэн но Кивалтэтлэн юрттэменыз Москваын удмурт калыклэн «Гербер» шулдыръяськонэз ортчоз.

Та шулдыръяськон Мускоын кыкетӥ арзэ радъяське ини. Туэ со шоркарлэн самой шораз, «Эрмитаж» садын, ортчоз.

Герберез Мускоын ортчытон тросгес калыкез элькунэнымы, удмуртъёслэн сям-йылолъёсынызы тодматэ, улосамы инвестициос кыскыны юрттэ.

Куноосты возьмало шулдыр тыпыртонъёс, жингрес кырӟанъёс, пӧртэм пумо мастер-классъёс но вожвылъяськонъёс, ческыт удмурт сиён-юонъёс.

Куно азбарын пӧсь перепечен куноятозы. Нош валтӥсь сцена вылын калыкез лумбыт шулдыртозы элькунысьтымы коллективъёс, соос пӧлын “Бурановские бабушки” коллектив но.

Пичи куноосты «Пичи Гербер» площадкаын шудон-серектонъёс витё. Эктыны яратӥсьёсты «Эктон коркаос» тыпыртыны дышетозы. Нош кибашлыос дышетозы басмалэсь мунё лэсьтыны, кускертон куыны, куролэсь чебер арбериос пӧрмытыны.

Озьы ик Герберын тодматскыны луоз Удмуртиысь турмаршрутъёсын, санаторийёсын но шутэтскон юртъёсын. Нош Тол Бабай но Пельняньлы сӥзем фестиваль сярысь интерактивной площадкаын тодыны луоз. Озьы ик куноос быгатозы оскалтыны но басьтыны элькунамы поттэм сиён-юонъёсты но усточиослэсь арбериоссэс.

Герберез сӥё-дано усьтонэ ӧтемын Удмурт элькунлэн Тӧроез А.В. Соловьёв, Москваысь Кивалтэтлэн йӧскалык политикая, улосвыл кусыпъёсъя но туризмъя департаментэзлэн кивалтӥсез Владимир Черников, Йӧскалык ужпумъёсъя федерал агентстволэн кивалтӥсез Игорь Баринов, Кун Думаысь депутатъёс, кунгож сьӧрысь кунъёслэн посольствоосысьтызы ӧнерчиос.

Йылпумъяськоз шулдыръяськон фейерверкен но позыръяськонэн, кудзэ ортчытозы «Эктоника» но «Электороники DJ’s» клуб.

Шулдыръяськон кутскоз 12.00 часэ. ужрадэз сӥё-дано усьтон – 15.00 часэ. Ватсаса ивортодэт басьтыны луэ таӵе телефонъя: 8(3412) 63-10-62, Дмитрий Корепанов, Калыкъёслэн Эшъяськон юртысьтызы режиссёр-постановщик.