16-тӥ пӧсьтолэзе Мускоын, Эрмитаж садын,Удмурт Элькунысь Тӧролэн но шоркар кивалтэтлэн юрттэмез улсын “Гербер” шулдыръяськон ортчиз. Празднике Удмуртиысь 250-лэсь трос адями мынӥз: артистъёс, фольклор коллективъёс, кибашлыос, дизайнеръёс, иворчиос.

Герберез Мускоын ортчытон тросгес калыкез элькунэнымы, удмуртъёслэн сям-йылолъёсынызы тодматэ, улосамы инвестициос кыскыны юрттэ.

Удмурт Элькунлэн Тӧроез вылӥ дунъет сётӥз шулдыръяськонлы. Азьланяз но та праздникез Россилэн шоркараз ортчытыны осконзэ вераз.

«Удмурт калыклэсь яратоно шулдыръяськонзэ Москваын ортчытыны сётэм кылмес быдэстӥмы. Праздник туж умой ортчиз. Мынам малпамея, кылем арен ӵошатыса, калык туэ тросгес вал. Нимысьтыз ӧтем куноос но тросгес вал. Сцена вылысен трос шуныт кылъёс но таукаронъёс чузъяськизы элькунамы улӥсьёслы. Муниципал ёросъёслы тау кареме потэ. Милемыз куарето ке но, «Гербер» шулдыръяськонэз Москваын азьланяз но ортчытомы. Москваын трос уло асьмен элькунысьтымы улосчиос. Соосын пумиськон, кенешон шумпоттэ. Соос чаклало азинтӥськеммес, кыло но адӟо асьмеды. Соин ик таӵе шулдыръяськонэз Москваын ортчытонлэн кулэлыкез вань!» – вераз А.В. Соловьёв.

Нимысьтыз ӧтем куноос пӧлын Москваысь Кивалтэтлэн йӧскалык политикая, улосвыл кусыпъёсъя но туризмъя департаментэзлэн кивалтӥсез Владимир Черников, Йӧскалык ужпумъёсъя федерал агентстволэн кивалтӥсезлэн воштӥсез Андрей Меженько, Россия Федерациысь Кун Думалэн Тӧроезлэн воштӥсез Андрей Исаев, Совет Федерациысь калыккуспо ужъёсъя комитетлэн кивалтӥсез Константин Косачев.

Нунал ӵоже пӧртэм мастер-классъёс ужазы, вожвылъяськонъёс радъяськизы. Куноос котькудаз пыриськыны турттӥзы, удмурт сиён-юонъёсты веръязы.

Герберын, дышем сямен, вӧсям ӝук сиизы. Со понна басьтэмын вал 75 кг. йыды кеньыр но ӟазег сӥль. Пӧзьтӥзы ӝукез 16 пуртыын .

Валтӥсь сцена вылын нунал ӵоже калыкез шулдыртӥзы Удмурт Элькунысь коллективъёс но артистъёс. Соос пӧлын фольклор кырӟанъя но эктонъя «Айкай» кун театр, кырӟанъя но эктонъя «Италмас» кун ансамбль, калык эктонъя «Эктон корка» студия, «Бурановские бабушки» коллектив, Россиысь дано артистка Валентина Пудова, Удмуртиысь калык артистка Анна Плотникова, Удмуртиысь дано артистка Надежда Уткина, удмурт рок-группа «Silent Woo Goore».

Нылпиос шудӥзы-серектӥзы «Пичи Гербер» площадкаын. Кибашлыосты котыраз люказ «Усточикар» площадка.

Гербер куноослы луонлык сётӥз элькунэнымы мургес тодматскыны. Санаторийёслэн но шутэтскон интыослэн стендъёссы дасямын вал. «Тол Бабайлэн резиденциез», «Пельнянь нунал», «П.И. Чайковскийлэн музей-юртэз» интерактивной площадкаос ужазы. Ижкарысь автозавод Lada Granta, LADA Vesta машинаоссэ возьматӥз. «Калашников» концерн лэсьтэм ужъёсыныз тодматӥз.Кылсярысь, та арын «Калашников» брендэн 4 пӧртэм ожтӥрлык вузаны поттэмын. Соос пӧлын 12 калибрен «Сайга 12К» пыӵал, кудиз пӧйшураны но, астэ утьыны но ярамон луэ.

Озьы ик радъямын вал Россия Федерацилэсь но Удмуртилэсь пулэсь лэсьтэм спилс-мутуссэс (картазэс) люканъя вожвылъяськон. Пенопласт пазлъёслэсь люкам Удмуртилэсь мутуссэ (быдӟалаез 3х6 м.) пуктӥзы но со вылэ элькунмылэсь тунсыко интыосызлэсь туспуктэмзэс интыязы.

Йылпумъяськиз Гербер фейерверкен но «Эктоника» ӵектос но «Электороники DJ’s» клубен дасям позыръяськонэн.

Туспуктэм: ИА “Удмуртия”