20-21-тӥ южтолэзе «Азербайджанский общественный центр Удмуртии «Достлуг» мерлыко огазеяськонлэн тыршеменыз но Удмурт Элькунысь йӧскалык политикая министерстволэн но «Евразия-Пресс» калыккуспо фондлэн юрттэмзы улсын «Новруз-Байрам» праздниклы сӥзем ужрадъёс ортчозы. Новруз – шунды лыдпусъя выль арлэн кутсконэз, инкуазьлэсь сайкамзэ, выльдӥськемзэ возьматэ. Новруз Байрам Азербайджанысь калыкъёслэн одӥгез валтӥсь но яратоно праздниксы. Со дышетэ ог-огдэ гажаны, вылезлы но ӟечезлы оскыны, тупаса улыны. Калык осконъёсъя, та нуналэ уг яра пӧяськыны, урод ужъёс лэсьтыны, куаретыны. Та нуналэ тылскем котыре огазе люкасько бӧлякъёс, эшъёс но бускельёс. Тылскем праздниклэн пусэз луэ. Калык верамъя, та тылскем вылтӥ тэтчыса чылкытано но тазамоно.

2009-тӥ аре 30-тӥ куарусенэ Новруз ЮНЕСКО-лэн адямилэсь ванёссэ пусйись лыдметаз пыртэмын вал. 2010-тӥ аре ООН-лэн Валтӥсь Ассамблеяез «21 марта – Международный день Новруз» нимо резолюци кутӥз.

Та праздниклы сӥзем ужрадъёсы Удмуртие Азербайджанысь политикъёс, тодосчиос, лулчеберет но экономика удысысь ӧнерчиос вуозы. 20-тӥ южтолэзе Удмурт Элькунысь йӧскалык политикая министерствоын «О перспективах развития сотрудничества» нимо котырес ӝӧк ортчоз. Та ужрад Удмуртия но Азербайджан кусыпъёсты юнматонлэн валтӥсь вамышез луоз. Праздникез пусъён азьланьтӥськоз «Тюльпан» кафеын (Ижкар, Удмурт ур., 304. Кутсконэз 18.00 ч.). Татчы Азербайджанысь куноос сяна ӧтемын на политикъёс, кивалтӥсьёс, Брангуртысь тодмо фольклор коллектив. Куноосты шулдыртозы «Достлуг» мерлыко огазеяськонлэн коллективъёсыз но Азербайджанысь тодмо крезьгурчиос. 21-тӥ южтолэзе Лулчеберетъя элькун колледжын «Новруз-Байрам» концерт радъяськоз. Куноослэн луонлыксы луоз тодматскыны праздниклэн йылолъёсыныз но мугамен.

Туспуктэм: https://en.wikipedia.org/wiki/Novruz_in_Azerbaijan#/media