1-тӥ оштолэзе 12-тӥ ползэ «Бадӟым удмурт диктант» акция радъяськиз. Элькунысь Тӧролэн Александр Бречаловлэн кичӧлтэмезъя, таиз ар егитъёслэн арзы шуыса пусйиське. Та ужрадэз озьы ик герӟазы Кузебай Гердлы но Ашальчи Окилы 125 ар тырмонэн. Диктантлы текст дасяз журналист но прозаик Мария Векшина.

«Мон понна туж бадӟым дан Бадӟым удмурт диктантэз радъясьёс пӧлын луыны. Текстэз меӵак К. Гердлэн но А. Окилэн улонэныз герӟаме ӧз поты, потӥз туала вакытэз возьматэме: даур ортчыса но улон уг воштӥськы. Жаль, ортчемез толло уг луы, со выльдӥське выль нуналын. Мон уг вераськы удмурт кыл но литература пумысен югдурез гинэ. Кылсярысь, ас вакытаз Ашальчи Оки нюръяськиз тракома висёнэн, К. Герд егит врачез “цветок трахоматозных полей” шуылӥз, нош алигес калыкез погыртӥз – коронавирус», – пусйиз Мария Векшина.

Азьласянь чотамъя, та дышетскон акцие ог 3000 адями пыриськиз. Ог 170 площадкаос Удмурт Элькунын, Башкортостанын, Татарстанын, Киров, Пермь улосвылъёсын но Москваын ужазы.

Пусйыны кулэ, «Удмуртия» телеканалын текстэз лыдӟиз журналист Светлана Пикулева. Отын ик аслэсьтыз тодон-валанъёссэ эскериз Татьяна Ишматова – Кун Кенешлэн, тодосъя, дышетонъя но кунмуртлыко огазеяськонъёсъя ялан ужась комиссилэн Кивалтӥсез, озьы ик Иван Софронов, «Шунды» огазеяськонлэн ёзчиез. «Мынам Удмуртие» радиоын текстэн тодматӥз УдГУ-ысь доцент Ольга Стрелкова. Диктантэз гожтӥзы Елена Миннигараева, «Удмурт нылкышно кенеш» огазеяськонлэн кивалтӥсез, но Никита Соприн, ИГМА-ысь дышетскись, «Шунды» огазеяськонлэн ёзчиез.

«Диктантэз нырысьсэ гожтӥ, школаын дышетскыкум. Дорын атаен ӵош радио пыр кылзыса пӧрмытылӥм. Тодӥсько на, та уж кельшиз шуыса, но котькуд ар пыриськыны кутски. Туэ шуд усиз «Мынам Удмуртие» радионын шонер гожъяськонъя но кылрадъянъя тодон-валанъёсме витетӥ ползэ эскерыны. Туж оскисько, вылӥ бал басьто шуыса», – вераз Никита Соприн.

Акцие озьы ик пыриськиз йӧскалык политикая министр Эдуард Петров.

«Бадӟым удмурт диктантэз, асьме шаерын сяна, мукет элькунъёсын но гожъяло. Шумпотымон, котькуд ар пыриськисьёслэн лыдзы будэ шуыса. Та одӥг гинэ Россиысь калыкъёслэн кылынызы гожтоно диктант, кудзэ нимысьтыз площадкаосын, радио но телевидение пыр кылзыса быдэстыны луэ. Ужэз гожтыса, асьмелэсь удмурт кылъя тодон-валанъёсмес но чакланы багатӥмы, Кузебай Гердэз но Ашальчи Окиез данъетамы», – пусйиз йӧскалык политикая министр.

Тодэ вайытоно, дорады гожтэм ужъёстэс 10-тӥ оштолэзёзь таӵе адресъя келяно: 426069,  Удмурт Элькун, Ижкар, Песочной ур., 9 яке электрон почтае diktant2023@yandex.ru.  Эн вунэтэ «Бадӟым Удмурт Диктант» шуыса нимзэ пусйыны.

Йылпумъянъёс 30-тӥ оштолэзёзь лэсьтозы. Сертификатъёсты 15-тӥ куартолэзёзь udmdiktant.ru вотэсбаме понозы. Ужъёсты УдГУ-ысь удмурт филологи факультетысь тодосчиос эскерозы.

Озьы ик, акци улсын Ашальчи Окилэн но Кузебай Гердлэн улон сюрессылы но творчествозылы сӥзем онлайн-тестирование радъяське. Тодон-валанъёстэс эскерыны быгатӥськоды https://www.udmdiktant.ru/test ссылкая.

2022-тӥ арын диктантэз элькунысь 125 площадкаосын гожтӥзы. Нош Татарстан, Башкортостан, Марий Эл элькунъёсын, Пермь, Владимир улосвылъёсын, Санкт-Петербург но Москва каръёсын 30 площадка радъяськиз. Оглом ужрадэ 2943 адями пыриськиз вал. Соос пӧлысь тужгес но егитъёсыз вал Ижкарысь, Башкортостанысь но Татарстанысь 7 аресъем улосчиос. Балезино ёросысь 85 аресъем кышномурт тужгес но арлыдоез луиз.