20-тӥ гудырикошконэ Удмурт Элькунысь йӧскалык политикая министрлэн нырысетӥ воштӥсез П.А. Орлов но министрлэн воштӥсез Л.Ю. Соковикова Воткакарсь ӧнерчиосын но азьветлӥсьёсын пумиськон ортчытӥзы. Соос люкаськемъёсты элькунысьтымы огъя йӧскалык политика югдурен тодматӥзы, министерстволэн планъёсыныз но ужрадъёсыз сярысь веразы.

Али министерство йӧскалык политика удысын ванёсъяёсъя центр лэсьтон бордын тырше. Та центрын йӧскалык политикаен герӟаськем ужпумъёсты сэрттозы-пертчозы, эскерозы, мониторинг лэсьтозы, выль ӵектосъёсты уже пыӵатон бордын тыршозы, калык куспъёсты радъянэн, анай кылэз утёнэн герӟаськем ужрадъёсты азьланьтыны но быдэстыны юрттозы.

Министерстволэн малпамезъя, таӵе центрлэн кулэлыкез туж бадӟым. Угось элькунмылэн йӧскалык политика удысын люкам быгатонъёсыныз Приволжской федерал округе пырись улосъёс тунсыкъясько но кулэясько. Калыкъёслэн Эшъяськон юртсы луыны быгатэ сыӵе база, кытын тужгес но ӟечъёсыз ӵектосъёс люкамын луозы.

Ванёсъя центрлэсь ужзэ радъян вылысь, мерлыко огазеяськонъёслы йӧскалык политика удысын методика юрттэт сётон но ивортодэт вӧлдытон вылысь, Министерстволэн кичӧлтэмезъя ёросъёсын калыкъёслэн эшъяськон юртъёссы усьтэмын луозы. Та арын сыӵе ужъюртъёс ужаны кутскоз Воткакарын, Можгаын но Уваын.

Мерлыко огазеяськонъёслэн ёзчиоссы тунскъяськыса кылзӥзы таӵе иворъёсты. Соослэн малпамзы выльдӥськонъёс юрттозы йӧскалык кусыпъёсты юнматыны, йӧскалык лулчеберетъёсты азинтыны, нылпиосты атыкай музъемез яратыны но гажаны дышетозы.

Азьветлӥсьёс асьсэлэсь сюлэмшугъёссэс но веразы. Егитъёс удымкрт кылэз ляб тодо, соин ик тросгес книгаос печатлано, кино но мультфильм удмурт кылын лэсьтоно. Со сяна ӵектӥзы Татарстанлэсь кичӧлтэмзэ уже кутыны: студентъёсын но школаын дышетскисьёсыны улосъёс куспын вошъяськон, интернациональной радио кылдытон. Таӵе ужрадъёс калыкъёслэсь но улосвылъёслэсь кусыпъёссэс юнматоз.