27-тӥ куартолэзе «Достлуг» Удмуртиысь Азербайджан мерлык центр Космонавтъёслэн Парказы «Ты моя мелодия» гала-концерт радъяз. Со сӥземын вал СССР-ысь калык артистлы Муслим Магомаевлы. Концертэ лыктэм куноос солэсь кырӟанъёссэ мылысь-кыдысь кылзӥзы. Пыриськисьёсты дипломъёсын но коньдон кузьымен данъетазы.

Вылӥ дунъет басьтӥзы:

ГРАН ПРИ – Павел Брыляков

I степенё лауреат – Элина Микрюкова

II степенё лауреат – Василий Шерстобитов

III степенё лауреат – Вургун Нуруллаев

Со сяна, огазеяськонысь азьветлӥсьёс Калыкъёслэн эшъяськон садазы нимысьтыз праздник ортчытӥзы: азербайджан огазеяськонысь азьветлӥсьёсты пусйизы, азербайджан арнянунал (воскресной) школаысь дышетскисьёс асьсэды возьматӥзы. Лыктэм куноослы но мӧзмыны ӧз сётэ. Соослы тунсыко экскурсия ортчытӥзы но йӧскалык эктонъёсын тодматӥзы.

Таиз ужрад кутскон сётӥз егитъёслы сӥзем этнокалендарьлы, кудӥз «БУД» ЭтноАкселераторын кылдытэмын вал.

Калыкъёслэн эшъяськон юртсылэн ивортодэтэзъя