21-24-тӥ куарусён толэзе Удмурт Элькунын финн-угор егитъёслэн лулчеберетсылы сӥзем «Палэзян» Калыккуспо фестиваль ортчоз.

Элькунамы “палэзяны” егит крезьгурчиос, суредасьёс, туспуктӥсьёс, гожъяськисьёс, кырӟасьёс вуозы. Кин ке ужрадэ арысь-аре пыриське, мукетъёсыз понна со выль усьтӥськиз инвис. Фестиваль улсын ортчись ужрадъёс, кылем аръёсы сямен ик, Ижкарын сяна ёросъёсын но радъяськозы.

Куноос понна пӧртэм пумо мастер-классъёс, тунсыко-пумиськонъёс, концертъёс но адӟытонъёс ортчытыны чакламын. Кылсярысь, 21-тӥ куарусёнэ егит суредасьлэн Анна Образцовалэн ужъёсыныз адӟытон усьтӥськоз. Вань мылкыд карисьёс «Эктон корка+» ужрадэ пыриськыса тодматскозы финн-угор калыкъёслэн эктонъёсынызы. Нош 23-тӥ куарусёнэ «Аксион» лулчеберет дворецын радъяськоз гала-концерт.