21-24-тӥ куарусёнэ Удмуртиын ортчиз финн-угор егитъёслэн 6-тӥез калыккуспо «Палэзян» фестивальзы. Ужрад сиё-дано усьтӥськиз Калыкъёслэн Эшъяськон юртазы но азьланьтӥськиз Ижкарысь пӧртэм площадкаосын. Фестиваль улсын мастер-классъёс, пумиськонъёс, котырес ӝӧк сьӧрын вераськонъёс, концертъёс ортчизы.

Фестивальлы кутскон сётӥз Мордовиысь лыктэм «Од Варма» арт-театрлэн но Удмурт Элькунысь Лулчеберетъя колледжын дышетскись студентъёслэн пумиськонзы. Удмуртъёс но мордваос тодматскизы ог-огзылэн калык дӥсьёсынызы, эктон-кырӟанъёсынызы. Та нуналэ ик Калыкъёслэн Эшъяськон юртазы Анна Образцовалэн «Ватэм пусъёс» адӟытонэз усьтӥськиз. Озьы ик фестиваль улсын «Ингож» альманахен тодматскон ортчиз. Выль бичетын егитъёслэн ужъёссы: вылӥ дунъям проза, поэзия, критика, драмматургия.

Фестивальлэн кыкетӥ нуналэз узыр луиз пӧртэм пумо пумиськонъёсын, мастер-классъёсын но котырес ӝӧкъёсын. Калыкъёслэн Эшъяськон юртазы котырес ӝӧк сьӧрын этномодаез улонэ пыӵатӥсьёс люкаськылӥзы. «Орнаментальные мотивы: традиция и современность» темая вераськонэз нуиз «Ажиотаж» театрлэн кивалтӥсез Олег Ажгихин. Шаерысьтымы тодмо но али кутскись дизайнеръёс люкаськемъёсты удмурт костюмен, чеберъяськон тӥрлыкъёсын тодматӥзы.Нош куноос асьсэ шаеразы модалэн азинскемез сярысь фото-видеоужъёссэс возьматӥзы.

«Бобровая долина» этнокомплексын финн-угор рок-группаос: Удмуртиысь « Silent Woo Goore», Комиысь «Малыми» но «Севериада», Марий Элысь «Куат» группаос – бытатонлыкъёссэс возьматӥзы. Со сяна Ижкарысь 11-тӥ номеро школаын финн калык инструментэн кантелеен шудӥсь Минна Раскинен но Марий Элысь «Куат» группа пиналъёсын пумиськон ортчытӥзы, асьсэлэн вордӥськем палъёссы сярысь веразы, творчествоенызы тодматӥзы. Нялтас вераса, 11-тӥ номеро школаын та дышетскон арын улонэ пыӵатыны кутскизы «Огъядышетонъя школаын пӧртэм калыкъёслэн лулчеберетсылы саклык висъяса дышетонэз радъян» ӵектосэз. Проект сӥземын калыкъёс сярысь тодон-валанэз школаын сётонлы, пиналъёсты туала трос калыко средаын улыны дасянлы.

Йылпумъяськиз кыкетӥ нунал «Лудорвай» музей-заповедникын. Татын «Сельское сакральное пространство народов Урало-Поволжья» калыккуспо этнографияя симпозиум улсын этношулдыръяськон ортчиз.

23-тӥ куарусёнэ, «Палэзянлэн» куинетӥ нуналаз, аспӧртэмлыко ужрад Армян черкын радъяськиз. Татын огазе пӧлэстӥськыса чузъяськизы удмурт крезь но финн кантеле.

Та нуналэ ик «Аксион» лулчеберет дворецын фестивальлэн гала-концертэз ортчиз. Люкаськем калык ӟырдыт кичабонъёсын пумитаз но келяз котькуд кырӟасез но коллективез. Соос пӧлын: Мордовиысь арт-театр «Од-Варма», Комиысь рок-группы «Севериада», Удмуртиысь Peace Pu но Garuda группаос, Марий Элысь «Куат» группа, Надежда Уткина но Минна Раскинен, егит кырӟасьёс Юлия Гаврилова, Ксения Ахметханова, Катерина КенJали. Концертлэн финалаз вань артистъёс «Мы финно-угры» кырӟанэз быдэстӥзы.