21-тӥ – 24-тӥ куарусёнэ Удмуртиын ортчоз финн-угор егитъёслэн 6-тӥез калыккуспо “Палэзян” фестивальзы. Ужрад сиё-дано усьтӥськоз Калыкъёслэн Эшъяськон юртазы но азьланьтӥськоз Ижкарысь пӧртэм площадкаосын. Фестиваль улсын мастер-классъёс, пумиськонъёс, котырес ӝӧк сьӧрын вераськонъёс, концертъёс ортчозы. Отчы пыриськыны быгатозы Ижкарын сяна, вань ёросъёсын улӥсьёс.

21-тӥ куарусёнэ усьтӥськоз егит удмурт суредасьлэн Анна Образцовалэн «Ватэм пусъёс» адӟытонэз. Анналэн ужъёсыз кылдытэмын пӧртэм выжы калыкъёслэн дунне шоры учконъёссы вылэ пыкиськыса.

Азьланьтозы ӝытэз эктонъёс. Вань мылкыд карисьёс «Эктон корка+» ужрадын тодматскыны быгатозы финн-угор калыкъёслэн эктонъёсынызы.

22-тӥ куарусёнэ Калыкъёслэн Эшъяськон юратзы «Орнаментальные мотивы: традиция и современность» темая котырес ӝӧк ортчоз. Ужрадэн кивалтоз модая «Ажиотаж» театрлэн директорез Олег Ажгихин.

Та нуналэ ик «Бобровая долина» этнокомплексын финн-угор рок группаослэн артистъёсынызы пумиськон ортчоз. Татын тодматскыны луоз Silent Woo Goore, «Малыми», «Севериада» (Коми), «Куат» (Марий Эл) группаосысь кырӟасьёсын но кантелеен шудӥсь Минна Раскиненэн. Йылпумъяськоз нунал калык шулдыръяськонэн, кудӥз радъяськоз археологияя но этнографияя «Лудорвай» музей-заповедникын.

23-тӥ куарусёнэ аспӧртэмлыко ужрад ортчытыны малпамын Армян апостол черкын. Татын огазе пӧлэстиськыса чузъяськозы удмурт крезь но финн кантеле.

Та нуналэ ик «Аксион» лулчеберет дворецын фестивальлэн берпуметӥ ужрадэз, гала концертэз, радъяськоз. Концертэ пыриськозы Комиысь лыктэм «Севериада», Удмуртиысь Peace Pu рок-группаос, озьы ик Башкириысь, Мордовиысь, Марий Элысь, Финляндиысь крыӟасьёс.

Ватсаса ивортодэт басьтыны луэ татысь: https://vk.com/palezjan