18-тӥ куартолэзе Москваысь но быдэс Росси кунысь Патриарх Кирилл Воткакарысь Благовещенской соборез вӧсяз но Божественной литургиез ортчытӥз.

Инмарлы оскисьёсын ӵош службае пыриськизы Удмурт Элькунлэн Тӧроез Александр Бречалов, йӧскалык политикая министертсволэн ӧнерчиосыз, со сяна ӟечлэсьтӥсьёс но меценатъёс, нимысьтыз ожгар ужрадэ пыриськисьёс но соослэн семьяоссы.

«Тау Ижкарысь епархилы православиез утемды, азинтэмды понна. Черкен герӟаськем улон азинске. Сыӵе азинтон уж выльысь усьтӥськись но пуктӥськись черкъёсын вӧсяськонъёсты ортчытон понна гинэ уг нуиськы, пиналъёсты но егитъёсты дышетонэн, пересьёс сярысь сюлмаськонэн герӟаськем мукет ужъёсты вӧлмытон понна но. Та дэлето епархилэн интывылаз вуыса мон шумпотыса верасько, татын зэмзэ но приходской улонлэн вань ӧръёсыз азинтӥсько шуыса. Вань сюлмысьтым ӟечкыласько! Христос кулэмысь улӟыса султӥз!» – вераз Патриарх Кирилл.

Воткакарысь Благовещенской собор элькунмылэн историяз но архитектураяз нимаз инты басьтэ. Со Удмуртиысь тужгес бадӟымез но Приволжьеысь одӥгез бадӟымез черк. Сое 20 ар пала Воткакарысь заводын ужась мастеровойёслэн коньдонэнызы пуктӥзы. 1840-тӥ арын отын вуоно дано крезьгурчиез – Пётр Ильич Чайковскиез пылатӥзы. Отын ик со нырысьсэ черк крезьгуръёсты но кырӟанъёсты кылӥз.

Храмен нырысетӥ удмурт святойёслэн нимъёссы но герӟаськемын – татын курадӟытэм священник отец Николай Чернышев. Революция дыръя со но солэн Варвара нылыз калыклы юрттэт сётытэк ӧз кыле. 1919-тӥ арын соосты ыбизы. 2018-тӥ арын соосты Ӟуч черклэн новомученикъёсыз но исповедникъёсыз пӧлы пыртӥзы.

1929-тӥ арын соборез ворсазы, кема аръёс ӵоже со клуб сямен ужаз.

2001-тӥ арын черкез берыктӥзы. Со дырысен тупатон-выльдӥськон ужъёс кутскизы. 2024-тӥ арын 7-тӥ толшоре выльдэм Благовещенской соборлэн вылӥ храмаз нырысетӥез Ымусьтон вӧсяськон ортчиз.

Ивортодэт УЭ-ысь Тӧролэн но Кивалтэтлэн вотэсбамысьтызы.