14-тӥ тулыспалэ Ижкарын выль праздник кылдӥз – Пельняньлэн нуналэз. Малы одно ик Ижкар луиз та празднкилэн интыез? Угось пельнянез удмуртъёс малпазы.

Тодӥськомы 14-тӥ тулыспалэ дунне пусъе мукет праздникез но – Яратӥсьёслэсь нуналзэс. Озьыен та кык праздникъёс одӥг нуналэ тупазы. Огшоры гинэ озьы ӧз пӧрмы, вылды. Ваньмызлы тодмо, макем шаерамы улӥсьёс ярато но гажало пельнянез. Соин ик та праздникъёсты ӵошен пусъён огзылэсь но данзэс уг кулэсмыты.

Фестиваль яркыт пӧрмиз! Пӧртэм калыкъёсты огазез со. Удмурт пельнянь сяна татын тодматскыны луонлык вал немец маульташенэн, пор подкогыльоен, узбек чучвараен, бигер мантыен, армян калыклэн боракиеныз но хинкалиеныз. Калыкъёс асьсэ сиёнэнызы тодматонзэс калык кырӟанъёсын но эктонъёсын шулдыртӥзы!

Фестивале котькуд лыктэм адями мылкыд каремезъя ужрад бырйыны быгатӥз. Валтӥсяз площадкан сиён пӧранъя вожвылъяськон ортчиз. Спортэз гажасьёслы луонлык кылдӥз пельнянь керлинген тодматскыны. Чупыресъёсыз куноос ӧз кышкалэ «Царь горы» шудонын асьсэды эскерыны.

Со сяна ужазы пӧртэм пумо мастер-классъёс. Одӥгъёсыз эктыны дышетӥзы, мукетъёсыз – горд сюен вырыны, куинетӥосыз – пельнянь пӧраны.

Пельменьфестлы бадӟым саклык висъязы ивор вӧлмитӥсь сӧзнэтъёс. Та ужрад сярысь трос вераськонъёс, кенешонъёс вотэс бамын мынӥзы. Пельменьфест ӟеч пӧрмиз, со сярысь верало адямиослэн пальпотӥсь ымныръёссы, умой мылкыдзы, шуныт кылъёссы!

Кӧня ке лыдпусъёс:

177 сюрс 487 пельнянь кутэмын вал Пельменьфестлы; фестивальлэн ужрадъёсаз пыриськиз 25 сюрс адями; 10 минутскын 100 кило пельнянь сиемын вал пельнянь веръян площадкаосын; огъя 3,5 тонна пельнянь сиемын вал; 15 пӧран амалъёс возьматэмын вал; 5 сюрс туспуктэмъёс но видео лэсьтэмын вал.

туспуктэмъёс: https://vk.com/pelmenfest?z=album-6343518_211556614