Удмурт Элькунысь йӧскалык политикая министерстволэн кенешон бӧлетаз Пельменьфестъя берпуметӥез пресс-конференция ортчиз. Журналистъёслэн юанъёссылы валэктон сётъязы Удмурт Элькунысь йӧскалык политикая министр Лариса Буранова, министерствоысь ӧнерчи Анна Габдуллина, «КультPrосвет» промо-группалэн кивалтӥсез Александр Старков, «8 человек» компанилэн проект-менеджерез Юлия Померанцева, Киужъёсты азинтонъя «Арбери» огазеяськонлэн ёзчиез Елена Наговицына, «РСО» огазеяськонлэн ёзчиез Мария Корнилова.

Фестивалез радъясьёслэн валтӥсь ужпумзы – «Удмуртия – пельняньлэн вордӥськем шаерез» валатонэз калык пӧлы паськыт вӧлмытон. Та ужпум быдэстэмын вал. Фестивалез радъясьёслэн верамзыя, Пельняньлэн нуналэзлы сӥзем ужрад паймытӥз аслаз быдӟалаеныз, пасьталаеныз, калыкез огазеяны быгатэменыз.

Фестивальлэн азьлапалэз сярысь юанлы валэктон сётыкуз Лариса Буранова шараяз ӵектослэсь малпанзэ: Удмуртия Пельняньлэсь нуналзэ пусъёнлэн валтӥсь площадкаез луыны кулэ, ӵапак татчы арлы быдэ дуннеысь вань пельнянь яратӥсьёс люкаськыны кулэ. Азьпалан малпамын на кылдытыны Пельнянь Резиденция, Пельнянь Академия но Пельнянь музей.

Юанъёслы валэктон сётон сяна, пресс-конференциын нылпи суредъёсъя вожвылъяськонлэсь вормисьёссэ данъян но ортчиз. Варвара Черныш, Анна Голенкова, Аделина Скобелева но Даниил Мамаев ужзы понна кузьымен но данъянэн пусъемын вал.

Лариса Буранова тау кариз ваньзылы, кин тыршиз та бадӟым выль Фестивалез радъян бордын, угось ӵапак ӵошен, огкылысь ужаны быгатон юрттӥз ужрадэз вылӥ ӟечлыкен ортчытыны.