10-тӥ тулыспалэ Ижкарысь Шор площадьын «Пельняньлэн дунневыл нуналэз» фестиваль ортчиз. Удмурт Элькунысь йӧскалык политикая но Кунпуш ужъёсъя министерствоослэн лыдъямзыя, Шор площаде та нуналэ 35 000 ёрос калык пыриськиз. Фестивальын Пельнянь ярмаркаын 8 тонна пельнянь вузамын вал.

Куноос пӧлын Удмурт Элькунлэн Тӧроез но вал. Люкаськем калыкез Фестивален ӟечкыласа, А.В. Бречалов элькунмылэсь турист маршрутъёс кылдытъяны бадӟым луонлыкъёсэ пусйиз.

Пӧртэм пуштросо, тусо, пӧртэм сямен пӧрам пельняньёсты оскалыты Удмуртиысь сяна мукет улосъёсысь но куноос вуизы. Туэ фестивале Мордовиысь, Дагестанысь, Татарстанысь, Пермь но Киров улосъёсысь делегациос вуылӥзы. Куноос понна радъямын вал пельнянь оскалтон но тужгес ческытэз пельнянь понна куарасётон сэрег.

Пельнянь сиён сяна, куноос понна ужазы трос мукет площадкаос но. Татын соос быгатӥзы пельняньлы сӥзем синпель кузьым ас киынызы лэсьтыны яке басьтыны, дизайнеръёслэн ужъёсынызы тодматскыны.

Кужымзэс эскеризы пельнянь ӵошатсконъёсын: “Пельнянь шудон” (пельнянь тусо тупъёсты пыдэстэм месъёсы лэзьян), «Пельнянькей» (пельнянь тупъёсыз вилка яке пельнянь ӝоктон выллем лэсьтэм клюшкаосын воротае пыртон), «Пельнянь эстафета», «Ижкар шумовка» но мукет.

Та секыт но тунсыко ӵошатсконъёсын кубок басьтӥз Грак ёросысь Печниковъёсэн семьязы.

Тодады вайытом, 10-тӥ тулыспалэ Фестивальлэн валтӥсь ужрадэз вал, нош 1-9-тӥ тулыспалэ Ижкарын фестиваль улсын нылпиослы но арлыдоослы пӧртэм пумо пумиськонъёс, мастер-классъёс радъяськылӥзы.

Фестиваль «Удмуртия – пельнянлэн дорез» брендэз азинтон улсын радъяське. Сӥземын со улосмес тодмогес каронлы, удмурт лулчеберетэз азинтонлы но вӧлмытонлы. Проект быдэстӥське Удмурт Элькунысь йӧскалык политикая министерствоен Президент грантъёсъя фондлэсь грантсэ уже кутыса.