Пумиськонэ пыриськизы Элькунысь йӧскалык политикая министр Лариса Буранова, Калыкъёслэн Эшъяськон юртэнызы кивалтӥсь Татьяна Боталова, Удмуртиысь йӧскалык лулчеберетъя огазеяськонъёслэн азьветлӥсьёссы.

Элькунысьтымы Калыкъёслэн Эшъяськон юртазы нырысьсэ лыктэмъёс понна Юртлэн кивалтисезлэн воштӥсез Татьяна Фёдорова экскурсия ортчытӥз. Со вераз: «Туннэ понна Эшъяськон юртлэн бур улаз 38 йӧскалык лулчеберетъя огазеяськонъёс пыро. Соос ар ӵоже турлы ужрадъёс ортчытъяло – конференциос, кенешонъёс, шулдыръяськон ӝытъёс, концертъёс, йӧскалык праздникъёс».

Куноосты асьсэ проектъёсынызы тодматӥзы асьме ӧнерчиос. Татьяна Волкова вераз «Билингва» удмурт центрлэн ужез сярысь, Алина Чернова – «Шундылэн» азинскемез сярысь. Еврей огазеяськонлэн кивалтӥсез Марк Гольдин 2 проектъёсынызы тодматӥз — «Герои народа – герои страны» но «По родному краю с любовью» но мукет.

Пумиськон «Пельняньлэн дунневыл нуналэз» фестивальлэн видео-тодматонзэ учконэн йылпумъяськиз.

«Милям кемалась ини Удмуртиысь ужъюлтошъёсынымы тодматскеммы потэ вал, — шуиз Пермь улосысь удмурт лулчеберетъя йӧскалык центрен кивалтӥсь Станислав Гадиятов. – Ужан амалъёсын люкиськон котькудмылы пайдаен берытскыны кулэ. Ми туж вожъяськиськом Удмуртиын таӵе Эшъяськон юртсы вань шуыса. Ти бадӟым уж нуиськоды. Нош милям вань луонлыкмы тӥляд ужан амалъёстэс асэстыны».

Ивор кутэмын Калыкъёслэн Эшъяськон юртсылэн вотэсбамысьтыз.