26-тӥ инвожое Перм улосысь Куеда ёросысь Бадӟым Гондыр гуртын фольклоръя «Чакара» улосвылкуспо фестиваль ортчиз. Татчы пыриськизы 13 улосъёсысь удмурт коллективъёс.

Нялтас вераса, туэ ужрад 7-тӥ ползэ радъяське ини. Фестиваль ортчытӥськиз Камсьӧр удмуртъёслэн йӧскалык центрзылэн кичӧлтонэзъя Удмурт Элькунысь йӧскалык политикая министрестволэн но Удмурт Элькунысь Кун Кенешлэн юрттэменызы. Туэ ужрадъясьёс полын Перм улосысь губернаторлэн администарациез, «Куеда ёрос» муниципал кылдытэт, Перм улосысь удмуртъёслэн йӧскалык центрзы.

Фестивальлэн валтӥсь ужпумъёсыз – удмурт калыклэсь кырӟанъёссэ, сям-йылолъёссэ утён, Россилэн пӧртэм улосъёсаз улӥсь удмуртъёслэсь Удмурт Элькунэн кусыпъёссэс юнматон. Перм улосысь удмуртъёс доры Удмуртиысь, Башкортостанысь, Татарстанысь, Марий-Элысь, Свердловск, Томск улосъёсысь, Эстониысь, Санкт-Петербургысь но Мускоысь фольклор ансамбльёс вуизы.

Куноос тодматскизы пӧртэм улосъёсын улӥсь удмуртъёслэн вашкала кырӟанъёсынызы, сям-йылолъёсынызы. Со сяна кыбышлыослэн ужъёсынызы адӟытон-вузкарон ужаз на.

Люкаськем калыкез ӟечкылазы Перм улсысь губернаторлэн администрациысьтыз йӧскалык ужпумъёсъя ёзэтэн кивалтӥсь Анастасия Субботина, Удмурт Элькунысь йӧскалык политикая министрлэн нырысетӥ воштӥсез Павел Орлов, но Камсьӧр удмуртъёслэн йӧскалык центрзылэн кивалтӥсез Флюра Чибышева.

Вераны кулэ на, та нуналэ куноос Элен вӧсе пыриськзы. Вӧсяськон ортчиз Бадӟым Гондырлэсь 8 километрлы огпалан, Кирга гуртын.