19-21-тӥ коньывуонэ Пермын калыкъёслэн огинзылы сӥзем огъя Росси форум радъяськиз. Татын йӧскалык политика удысысь лэчыт но бичатӥсь юанъёс эскериськизы. Ужрадэ Россиысь 70 улосъёсысь 800-лэсь ятыр делегатъёс пыриськизы.

Форум улсын радъямын вал пӧртэм пумо пумиськонъёс, кенешъёс, мастер-классъёс, ӵектосъёсын тодматсконъёс.

Ужрадэ элькунысьтымы но делегаци пыриськиз: йӧскалык политикая министр Л.Н. Буранова, министрлэн воштӥсез Л.Ю. Соковикова, Калыкъёслэн Эшъяськон юртсылэн кивалтӥсез Т.П. Боталова, мерлыко огазеяськонъёслэн азьветлӥсьёссы.

Улосчиосмы форумысь вормонъёсын бертӥзы. Озьы, йӧскалык политика удысын ӵектосъёсты быдэстӥсь мерлыко огазеяськонъёслэн кивалтӥсьёссы куспын огъя Росси вожвылъяськонын «Егитъёслэн мерлыко ӵектоссы» номинациын вормисе потӥз элькунысьтымы егитъёслэн мерлыко огазеяськонъёссылэн «Вместе» ассоциацизылэн кивалтӥсез Мария Царева.

Россия Федерациысь федерал округъёслэн командаоссылэн вожвылъяськоназы Приволжской федерал округлэн командаез Гран-при утӥз.Та командалэн кыкез ёзчиез Удмурт Элькунысьтымы вал.