21-тӥ куартолэзе Кез ёросыь Сосновый Бор гуртысь «Живица» возёсын пичи гинэ будослы, пешниклы, сӥзем «Pest-Fest» нимо элькун фестиваль ортчоз. Ужрадэз ортчытыны юртто Удмурт Элькунысь йӧскалык политикая министерство но Калыкеъёслэн Эшъяськон юртсы. Соослэн верамзыя, «Pest-Fest»фестиваль Пельняньлы сӥзем фестивалез азинтэ. Угось Кез ёросын пешниклэсь тужгес но ческыт пельнянь пӧрало. Та будос вазь тулыс лымы шунам бере ик потэ, уйпал удмуртъёс сое мешокъёсын бичало. Туж данъяло та пешникез, малы ке шуоно солэсь уно сиён пораны луэ, пӧртэм витамениъёсын но узыр со.

Уйпай удмуртъёслэн аспӧртэмлыко сиёнъёсынызы но юонъёсынызы, удмурт калыклэн тулыс ортчытоно сям-йылолъёсыныз тодматскемды ке потэ, одно ик вуылэ фестивале! Кузёос ӟеч мылкыд но кузьмалозы, пешниклэсь перепеч, пельнянь пӧраны но дышетозы.

Люкаськем калыкез шулдыртозы Дэбес ёросысь «Чупчи гур» но «Льӧмпу сяськаос», Ижкарысь «Зарни крезь» коллективъёс.

Ужрадъясьёслэн ивортэмзыя, фестивале вуозы элькунысьтымы, Пермь но Киров улосъёсысь, Башкортостанысь но Татарстанысь куноос.

Фестивалез сиё-дано усьтон ужрад кутскоз 11.00 часэ.

Ватсаса ивортодэт басьтыны луэ таӵе телефонъя: 8(950)175-93-14 – Бабина Ирина Ивановна, «Кезс ёросысь лулчеберет юрт» МКВЛУ-ысь туризмъя ёзэтэн кивалтӥсь; (3412)63-10-62; 8(912)878-56-52 – Корепанов Дмитрий Валериевич, Калыкъёслэн Эшъяськон юртысьтызы режиссер-постановщик.