26-тӥ куартолэзе 15.00 часэ Калыкъёслэн эшъяськон юртазы Туспуктэмъёсъя «Мынам песянае» II элькун вожвылъяськонлэн вормисьёсыз ялэмын луозы.

Вожвылъяськонэз радъязы «Известия Удмуртской Республики» газет но Удмурт Элькунысь йӧскалык политикая министерство.

Элькунысьтымы котькуд улӥсь пыриськыны быгатӥз вожвылъяськонэ. Со понна газетлэн редакцияз 13-тӥ тулыспалысен 22-тӥ куартолэзёзь ыстоно вал песянайлэсь туспуктэмзэ. Кылем арын сямен ик вожвылъяськонэ пыриськыны мылкыд карисьёс трос люкаськизы. Туспуктэмъёс вуылӥзы улосмылэн пöртэм сэрегъёсысьтыз. Фотоосы учкыны луэ вал газетлэн вотэсбамысьтыз (https://izvestiaur.ru) но Вконтакте огинэтысь.

Вормисьёсты быръёзы 5 номинация: «Тужгес но узыр песянай» (нунокъёсыныз узыр), «Тужгес но пинал песянай», «Ба!» (песянайлэсь быгатонлыкъёссэ возьматӥсь туспуктэм), «Тужгес но деловой песянай». Со сяна, лыдӟисьёслэн куременызы, та арын «Мынам песятае» выль номинаци ялэмын вал. Котькуд вылӥ верам номинациосъя 3 вормисьёсты быръёзы.

Вожвылъяськонэ мылкыд каризы пыриськыны пӧртэм песянайёс: ужлэн ветеранъёсыз, дано песянайёс, 39-42 аресъем песянайёс, ужась песянайёс, трос нуноко песянайёс. Огъя келямын вал 50-лэсь ятыр туспуктэмъёс.

Таӵе ужрад редакциын ужасьёслы луонлык сётӥз аспӧртэмлыко фотолетопись лэсьтыны.