19-тӥ толсуре Ижкарысь Калыкъёслэн эшъяськон юртазы «Пичи чеберайёс но батыръёс» вожвылъяськонлы йылпумъянъёс лэсьтэмын. Ужрадэ пыриськизы элькунысь но бускель улосвылъёсын улӥсь удмуртъёс. Валтӥсь ужпумез – калыкъёслэсь кылзэс но лулчеберетсэс утён, дышетон но азинтон.

«Пичи чеберайёс но батыръёс» ӵектэ каръёсысь но черкогуртысь дышетон ужъюртъёсын удмурт кылэз выль амалъёсты уже кутыса дышетыны. Ужрадэ пыриськисьёс пӧлын нылпи садэ ветлӥсьёс (5-7 арес) но 1-4-тӥ классъёсын дышетскисьёс (7-11 арес).

Тодэ вайытоно, нырысетӥ этап онлайн амалэн ортчиз. Вань пыриськисьёс заявка но видео амалэн визитка, творческой номер но калыклэн лулчеберетэз сярысь мадён-малпаськон ыстӥзы. Ижкарысь но элькунлэн уйпал, лымшор но шор ёросъёсысьтыз дунъясьёс тужгес но умой ужъёсты бырйизы. Котькуд арлыд категориын 10 вормись – вить ныл но вить пи. Вормисьёс таӵе титул басьтӥзы – Уйпал Чеберай, Уйпал Батыр, Лымшор Чеберай, Лымшор Батыр, Шор Чеберай, Шор Батыр, Город Чеберай, Город Батыр, Покчи Кылчи.

Мальвина Уракбаевалэн, дунъясьёс пӧлысь одӥгезлэн, верамезъя, вань пыриськисьёс туж тунсыкоесь но котькудзы асьсэ сямен адӟо вожылъяськонлэсь пуштроссэ но сое усьтон амалъёсты. «Туж секыт дунъяны пичи пиналъёсты, соос ваньзы тунсыкоесь, визьмоесь, чебересь, нош тужгес но дуноез – ваньзы удмурт кылын верасько. Соослы тунсыко потэ ас калыксылэн лулчебертэз, историез, сям-йылолъёсыз. Соин ик малпасько, соос ваньзы вормисьёс шуыса. Пиналъёс, выль вормонъёс тӥлед! Оскисько, асьсэды возьматон понна, та берпутӥез вожвылъяськон ӧвӧл».

Удмурт Тол Бабай но Лымыныл вормисьёслы кузьымъёс сётӥзы. Шаркан ёросысь 3-тӥ классын дышетскисьлы Кариналы вожвылъяськонын бадӟым команда юрттӥськиз. «Анаеным кылъёсты дышетӥ, школаын но клубын репетировать карим – ваньмы ӵош дасяським. Туж шумпотӥсько, вормисе потӥ шуыса», – вераз Карина.

«Удмурт кенеш» огазеяськон но «Удмурт нылкышно кенеш» улосвыл мерлык движение та ужрадлэн радъясьёсыз луо. «Таяз аре ог 400 заявка келямын вал. Улосвыкуспо вожвылъяськонэ Удмурт шаерысь, Татарстан, Башкортостан элькунъёсысь удмурт кылын вераськисьсь пиналъёс мылысь-кыдысь пырисько. Егитъёслы кылдэ бадӟым луонлык асьсэды возьматыны, таланто луэмзы, дуно ёроссы, черкогуртсы сярысь вераны. Шумпотымон, вожвылъяськонэ дасяськыку, пиналъёс, анай-атайёс но дышетӥсьёс ваньзы огинын ужало шуыса. Ӵош дасяло костюмъёс, асьсэды возьматон понна сценарий гожто», – вераз Елена Миннигараева, «Удмурт нылкышно кенеш»-лэн кивалтӥсез.

«Пичи чеберайёс но батыръёс» вожвылъяськон 15-тӥ ползэ ортче ни.