Пичи Пурга ёросысь куинь школаосы – Баграш-Биграысь, Шор Кечолысь но Учаысь школаосы интерактивной тӥрлык вуиз. Дышетскисьёс соосын мыло-кыдо ужаны кутскизы ини анай кылъя урокъёсын. Со юрттэ калыклэсь кылзэ, лулчеберетсэ но сям-йылолъёссэ выль технологиосты уже кутыса эскерыны.

Школаос юнме шорысь быръемын ӧвӧл – та ужъюртъёсын удмурт кылэз тужгес но мыло-кыдо эскеро дышето. Кылсярысь, Баграш-Бигра школаын кылэз вань пиналъёс дышето. Со сяна, удмурт кылэз тодӥсь дышетскисьёс йӧскалык дӥсъёсын ветло.

Пичи Пурга ёросысь вань школаосын удмурт кылын пӧртэм гинэ ужрадъёс ортчытъясько. Бадӟым саклык висъяське грантъёсъя вожвылъяськонъёсы. Озьыен, «Пичи чеберайёс но батыръёс» (0+) ӵектос кутскиз – Лулчеберет кичӧлтонъёсъя Президентлэн фондэзлэн вормисез. Кызьы верало проектлэн радъясьёсыз, со луоз  яркыт йӧскалык фестиваль, кудӥз пичиосты сям-йылолъёсъя дуннее муромытоз.

Та программа 2025-тӥ арын азьланьтӥськоз. Тӥрлыкъёс анай кылъя кабинетъёсы элькунлэн муниципалитетъёсысьтыз выльысь быръем школаосы вуылозы. Котькуд ёрос школаос басьтозы сое, мар соослы кулэ, кылсярысь, интерактивной панелъёс, монитор, ноутбук, принтер, видеокамера но мукет.