24-тӥ южтолэзе Удмурт кун университетлэн В.А. Журавлев нимо дышетон-тодослыко лыдӟетъюртаз «Поэзия без границ» творческой ӝыт ортчоз. Ужрад Поэзилэн нуналэзлы сӥземын.

Люкаськем калык азьын асьсэлэсь кылбуръёссэс лыдӟозы:

* Виталий Кальпиди – Челябинскысь кылбурчи, Уралысь кылбурет школалэн кылдытӥсез, 11 книгаослэн авторзы, культуртрегер, критик. Солэн кылбуръёсыз 15 кылъёсы берыктэмын.

* Марина Волкова — книга поттӥсь, культуртрегер, литератураез но лыдӟиськонэз азьланьтӥсь ӵектосъёслэн кылдытӥсьсы но радъясьсы.

* Анна Бурдина – Удмурт кылосбуръя, финн-угор тодосъя но журналистикая институтын 2-тӥ курсын дышетскись. 2016-тӥ арын кылбуръёсын «Гочатыса» нырысетӥ бичетэз потӥз. Со Анналы крезьгуръя «Куарагур» ӵектосоны вормисе потэмез понна кузьым вал.

* Марина Пахомова – Удмурт кылосбуръя, финн-угор тодосъя но журналистикая институтын 4-тӥ курсын дышетскись. Удмурт егитъёслэн «Шунды» огазеяськонзылэн «Куарагур-2» ӵектосазы вормыса, Марина 2015-тӥ арын кылбуръёсыныз нырысетӥ бичет поттыны быгатӥз. Нимаське бичетэз – «Йыртэмпол» .

* Галина Дружинина – кылбурчи.

Куноослэсь, кылбуръёс сяна, та ӝытэ мылкыдзэс ӝутозы крезьгуро номер но кылбурет видео-арт.Ужрадлэн пумаз эрико микрофон ужалоз, котькуд мылкыд карись аслэсьтыз кылбурзэ лыдӟыны яке ортчем ӝыт сярысь малпанъёссэ вераны быгатоз.

Ужрад кутскоз 17.30 часэ. Пыронэз дунтэк.