20-тӥ тулыспалысен 16-тӥ южтолэзёзь «Тарасовское» но «Соколовское» муниципал кылдытэтъёсын пор лулчеберетлы сӥзем нуналъёс ортчизы.

26-тӥ тулыспалэ пор лулчеберетъя «Розмари» центрын («Тарасовское» муниципал кылдытэт, кивалтӥсез О.В. Попова) бадӟым ужрад ортчиз. Лыктэм куноос тодматскыны быгатӥзы пор калыклэн сюан сям-йылолъёсыныз, задор тыпыртонъёсыныз, шулдыр кырӟанъёсыныз.

Нош 16-тӥ южтолэзе пор лулчеберетъя «Чолга шудыр» центр («Соколовское» муниципал кылдытэт, кивалтӥсез Е.З. Хорошавцева) кылдэм дырысеныз 10 ар тырмемзэ пусйиз. Трос куноос люкаськизы: Удмурт Элькунысь пор калыклэн мерлыко огазеяськонзылэн кивалтӥсез А.И. Радыгин, «Сарапул ёрос» муниципал кылдытэт администрациысь Лулчеберетъя но егитъёсын ужан политикая кивалтоннилэн кивалтӥсез Ольга Владимировна Киселева, «Соколовское» муниципал кылдытэтлэн тӧроез Любовь Викторовна Лихачева но трос мукетъёс. Та ӝытэ чузъяськизы трос ӟеч кылъёс но сӥзёнъёс.

Кырӟам-эктэм бере эскеризы на пор лулчеберетъя элькун фестиваль ортчытон сярысь юанэз. Туэ со ортчоз 12 оштолэзе Грак черкогуртын.

Та выллем ужрадъёс калыкъёсты огазеяны, ог-огзэс валаны дышето. Центрын ужасьёс рос-прос тыршо калыклэсь лулчеберетсэ утён, азинтон но вӧлмытон удысын. Соин ик оскон кылдэ, пор лулчеберет уз ышы, уз вуны шуыса.

Ужрадэз радъязы: Удмурт Элькунысь пор калыклэн «Одо Мари Ушем» мерлыко огазеяськонэз, Калыкъёслэн Эшъяськон юртсы, Удмурт Элькунысь йӧскалык политикая министерство.