Президентлэн фондэзлэн кыкетӥ вожвылъяськонэзлэн йылпумъянъёсыз лэсьтэмын вал. Калыкъёслэн Эшъяськон юртсылэн командаез «Шунды», «Удмурт Кенеш» но «Артэ» огазеяськонъёсын валче 3 ӵектослы 2,3 миллион коньдонэн юрттэт басьтӥзы.

Егитъёслы БУД ЭтноАкселератор – со 14-35 аресъем егитъёслы ог-огенызы вераськон но ужан, патриотизм мылкыдэз пыӵатон но калыкъёссылэсь аспӧртэмлыко лулчеберетсэс, сям-йылолъёссэс утён уже кыскон йӧскалыккуспо площадка. Ӵектос улсын егитъёслэн 10 командаоссылы пӧртэм ужрадъёс ортчытӥськозы – коммерциен герӟаськымтэ огазеяськонъёслэсь (НКО) ужзэс мытон понна нимысьтыз программаос кылдытонъя, командаын ужан амалъёсты азинтонъя, ИТ-технологиосты кутонъя, волонтёръёсын ужанъя но мукет. Нимысьтыз саклык висъямын луоз йӧскалык кусыпъёсты тупатон удысын наставничество амалэз уже кутонлы. Ӵектослы йылпумъянъёс егитъёслы сӥзем «Валамон» форумын лэсьтозы.

«Удмуртиысь этноволонтёръёслэн улосвыл корпуссы» ӵектос юрттоз шаерысьтымы егитъёсты огазеяны; Удмуртиын улӥсь калыкъёслэсь лулчеберетсэс валан, ас мылкыд каремзыя ужан, СВО-е пыриськисьёслэн семьяоссылы юрттэт сётон пыр соослэсь граждан асваланзэс но асшӧдонзэс юнматыны. Калыкъёслэн Эшъяськон юртазы этноволонтёръёсын, командаосын, экспертъёсын но визь-кенеш сётӥсьёсын ӵош ужан площадка радъяськоз. Добровольчество, этномедиация, ӵектосэн кивалтон, медиасопровождение но этнокультурной ужрадъёсты радъянъя удысъёсысь ӧнерчиосын пӧртэм дышетон но практической ужрадъёс ортчозы. Со ӵектосэ пыриськисьёслэсь тодон-валанъёссэс ӝутоз, будонзылы но пайдаё ужамзылы бадӟым юрттэт луоз.

Билингвизмъя (кыккылолыкъя) «Билингва» удмурт центрлэн ужрадъёсаз Удмуртиысь каръёсын но ёросъёсын улӥсь пӧртэм кылъёсын вераськись семьяос, дышетӥсьёс, билингвизмъя ӧнерчиос, 2-10 аресъем нылпиос пыриськыны быгато. Проект кылдэмен удмурт, бигер, пор семьяос анай кылын вераськонзэс паськытато. Ӵектос улсын Калыкъёслэн Эшъяськон юртазы радъяськозы кылэз волятӥсь пӧртэм ужрадъёс: шудон но творчество пыр кылэз дышетон занятиос, методической юрттэт сётонъя семинаръёс, лулчеберетлы сӥзем шутэтскон ужрадъёс но мукет.