18-тӥ гудырикошконэ Глазкарын Балезино, Глаз, Юкаменск, Яр ёросъёсысь йӧскалык политика удысын ужасьёс понна калык кусыпъёсты радъянлы, йӧскалык лулчеберетэз азинтонлы сӥзем ӵектосъёсты кылдытыны но быдэстыны дышетӥсь семинар радъяськоз. Та пумиськон гудырикошкон-куарусён толэзъёсы ортчытоно семинаръёс пӧлысь нырысетӥез луэ.

Удмурт Элькунысь йӧскалык политикая министерствоысь но Калыкъёслэн Эшъяськон юртысьтызы ӧнерчиос элькунамы но огъя Россиын радъяськись вожвылъяськонъёсы пыриськон понна ӵектосъёсты шонер гожъяны дышетозы, соосты фондъёслэн экспертъёссылы возьматыны валэктозы, янгышъёс сярысь вералозы.

Семинаре ӧтемын лулчеберет ужъюртъёсысь ӧнерчиос, мерлыко огазеяськонъёслэн кивалтӥсьёссы но ёзчиоссы.

Вуоноез таӵе ужрад ортчоз 24-тӥ гудырикошконэ Эгра каргуртын.