26-тӥ пӧсьтолэзе Удмурт Элькунысь йӧскалык политикая министрестволэн но Калыкъёслэн Эшъяськон юртсылэн юрттэменыз элькунысьтымы армъянъёслэн «Урарту» мерлыко огазеяськонзы «Вардавар» калык шулдыръяськон ортчытӥз.

Ужрад ортчиз армян черклэн азбараз, татчы элькунмылэн 25 ёросъёсысьтыз армянъёс люкаськизы, озьы ик Татарстанысь, Башкортостанысь, Пермысь но Ростов-на-Дону карысь куноос вуизы.

Люкаськем калыкез ӟечкылаз но мерлыко огазеяськонлэн ёзчиосызлы йӧскалык политикаез радъянын бадӟым уж нуэмзы понна тау кылъёс вераз министрлэн нырысетӥ воштӥсез Павел Анатольевич Орлов. Озьы ик армянъёсты ӟечкылазы мерлыко огазеяськонъёслэн кивалтӥсьёссы.

Вардавар – вашкала праздник, сӥземын ю-няньлэн удалтыса будонэзлы, тупаса улонлы, сьӧлыкъёсты но вожпотонъёсты вунэтонлы. Та нуналэ армянъёс ог-огзэс вуэн пылатъяло, шурез плуген гыро вылэм. Озьы вашкала калык инмарлэсь зорзэ куре вылэм. Нош армянъёс христиан осконэз кутэмзы бере, та нуналэ ог-огеныд тупаса улонэз но пусйыны кутскизы.