Ижкарысь 11-тӥ номеро школаын выль дышетскон арын Удмурт Элькунысь йӧскалык политикая министерстволэн юрттэмез улсын улонэ пыӵатыны кутскозы «Огъядышетонъя школаын пӧртэм калыкъёслэн лулчеберетсылы саклык висъяса дышетонэз радъян» (Модель поликультурного образования в условиях общеобразовательной школы) ӵектосэз.

Экспериметальной площадкалэн ужез дышетӥсьёслэсь, пиналъёслэсь но соолэн анай-атайёссылэсь пӧртэм выжыысь калыкъёс сярысь тодон-валанзэс будэтон-муромытонлы сӥземын.

Пӧртэм калыкъёсын тодматонэз дышетон программае быгатыса но радзэ валаса пыртон экспериментальной школаысь, озьы ик улосысь калык кусыпъёсты юнматыны но ӟечомытыны, Россия Федерациын улӥсь пӧртэм калыкъёсты огазеяны (россия йӧслык кылдытыны) юрттоз.

Проект сӥземын калыкъёс сярысь тодон-валанэз школаын сётонлы, пиналъёсты туала трос калыко средаын улыны дасянлы, дышетӥсьёслэсь быгатонлыкъёссэс будэтонлы, школаын басьтэм опытэз карысь но элькунысь мукет школаосын пыӵатыны юрртонлы.

Школаын котькуд дышетон предметэ пыртэмын луоз калыкъёс сярысь тодон-валан. Озьы пинал огъя дышетон прогаммаез ортчон улсын, Россиын но дуннеын улӥсь калыкъёслэн лулчеберетэнызы но сям-йылолъёсынызы тодматскоз. Школаын радъяськись ужрадъёсы но пыртэмын луоз калыкъёсын тодматон элемент.

Школаысь дышетӥсьёслы та программая ужан понна, Удмурт Элькунысь дышетонэз азинтонъя институтын нимысьтыз курсъёс радъямын луозы.

Проектлы йылпумъян луоз нимысьтыз дасям методической юрттос. Татын эскериськоз калыкъёслэн лулчеберетэнызы, сям-йылолъёсынызы тодматонлэн туала дышетон программаосын интызы. Азьланяз элькунамы калыкъёслы сӥзем дышетон сӧзнэтэз радъян вылысь, дышетӥсьёс асьсэлэсь визь-кенешсэс сётозы.