11-тӥ тулыспалэ 2017-тӥ аре Ижкарын Пельняньлы сӥзем фестиваль ортчиз. Удмурт Элькунысь йӧскалык политикая но Кунпуш ужъёсъя министерствоослэн лыдъямзыя, та нуналэ Шор площаде 32 сюрс адями люкаськылӥз. Со сяна ог 3 сюрс адями Ижкарысь пӧртэм кафеосын но ресторанъёсын радъяськылэм мастер-классъёсын пӧртэм пумо пельнянь кутыны дышетскиз.

Фестивальын рекорд пуктэмын! 6 час куспын 74059 пельнянь сиемын, 6,5 тонна кынтэм пельнянь вузамын.

Шулдыръяськонэз усьтӥзы Удмурт Элькун Кивалтэтлэн Тӧроез Виктор Савельев, Удмурт Элькунысь йӧскалык политикая министр Лариса Буранова, Ижкарлэн Тӧроез Юрий Тюрин, рекордъёсъя «Интеррекорд» агентствоысь ӧнерчи Влад Копылов.

«Туннэ асьмеос одӥг интыын тужгес но трос пельнянь сиёнъя рекорд пуктомы! Со понна 6 час куспын 70000 пельнянь сиёно!»- та кылъёсын Влад Копылов пельнянь сиёнлы кутскон сётӥз.

Сием пельнянез лыдъян онлайн мынӥз. Котькуд лыктэм адями адӟыны быгатӥз сое нимысьтыз интыям таблоысь.

Та нуналэ котьма герӟаськемын вал пельнянен. Азьвыл аръёсы сямен ик, тунсыко шудонъёс радъяськизы: пельняньтон (бадминтон), пельнянькей (тупен хоккей), нискылась пельнянь (керлинг) но мукет. Куноос понна ужазы кибашлыослэн, дизайнеръёслэн ужъёсынызы адӟытон- вузкарон. Радъяськизы «Ижкарысь открытка» но «Экорекорд» акциос. Пельнянь ярмаркае Удмуртиысь но Россилэн мукет улосъёсысьтыз 21 пельнянь лэсьтӥсь предприятиос пыриськизы.

Тужгес ӟеч пӧрасьёсты «Зарни пельнянь» премиен пусйизы. Озьыен, «Калыкез вылӥ ӟечлыко сюдон» нимез басьтӥзы «Барвинок» кафе но «Mozzo» ресторан. «Вылӥ ӟечлыко сиён лэсьтӥсьёс» номинациын вормисе потӥзы: Эгра ёросысь Т.А. Степанова ужбергатӥсь – «Пельмени говяжьи»; ЗАО «Агрофирма «Мясо» – «Пельмени крестьянские»; «Пельмени по-домашнему» – ТМ «РусОпт».

Вераны кулэ на, 12-тӥ тулыспалэ Ижкарысь Шор площадьын пельнянен вузкарон азинтӥськоз на.

Справка: «Пельняньлэн дунневыл нуналэз» фестиваль арлы быдэ Удмурт Элькунын ортче. Валтӥсь мугъёсыз: улосвыллы ӟеч имидж кылдытон, элькунмес тодмо карон, удмурт лулчеберетэз вӧлмытон. 2017-тӥ арын Фестивальлэн девизэз «Ми рекорд пуктомы!».