Россиын 14–35 аресъем егитъёс 40 миллион мурт лыдъясько. Росмолодёжь кылдытэ сервисной площадкаос, кудъёсыз егитъёлэсь тодон-валанъёссэс узырмытозы, Россиысь мерлыко лифтъёсъя вылэгес ӝутскыны юрттозы.

Форумъёсы пыриськыны быгато 14-сен 35 аресозь егитъёс, кудъёсызлы тунсыко луо: асазинскон, дышетскон, выль тодматсконъёс, ужудыс ласянь будон. Росмолодёжлэн ужрадъёсыз луонлык сёто огкадь мылкыдъем адямиосын команда кылдытыны но улонэз умой пала воштыны.

Федерал но улосвыл форумъёсы очной но заочной амалэн пыриськыны луэ. Ар ӵоже ужась форумын луозы на предфорум ужрадъёс: творческой мастерскойёс, «лыдпус арняос», пӧртэм дышетскон программаос. Озьы ик форум бере ортчись (постфорум) ужрадъёс: наставничество, карьера ласянь визь-кенешъёс, партнёръёслэсь бонусъёс.

Форумлэн тематикаяз пыре: дышетскон, ужбергатон но карьера, наставничество, мерлыко гуманитарной тодосъёс, креатив индустрия, ивортодэтъя технологиос, медиа, экология но мукет.

Ужрадэ пыриськон дунтэк луэ. «Росмолодежь.События» платформаын регистрация гинэ ортчыны кулэ. Отысь асьтэлы тунсыко форум быръелэ но вожвылъяськонлэсь куронзэ быдэстэлэ.